“X’Inhi l-​Verità?”

IL-​GVERNATUR Ruman Ponzju Pilatu b’mod sarkastiku staqsa lil Ġesù din il-​mistoqsija. Hu ma kienx interessat fi tweġiba, u Ġesù ma tahilux. Forsi Pilatu kien iħares lejn il-​verità bħala xi ħaġa diffiċli wisq biex tifhimha.​—Ġwanni 18:38.

Illum ħafna wħud għandhom l-​istess nuqqas taʼ rispett lejn il-​verità, inkluż mexxejja reliġjużi, edukaturi, u politikanti. Huma jemmnu li l-​verità​—speċjalment il-​verità morali u spiritwali​—m’hijiex assoluta imma relattiva u dejjem tinbidel. M’għandniex xi ngħidu, dan jagħtina x’nifhmu li n-​nies jistgħu jiddeterminaw għalihom infushom dak li hu tajjeb u dak li hu ħażin. (Isaija 5:​20, 21) Ukoll, dan jagħti l-​wisaʼ biex in-​nies iwarrbu fil-​ġenb bħala antikwati l-​valuri u l-​livelli morali li ħaddnu l-​ġenerazzjonijiet li għaddew.

L-istqarrija li qanqlet lil Pilatu jistaqsi l-​mistoqsija tiegħu hi taʼ min jinnotaha. Ġesù kien qal: “Għal dan jien twilidt, u għal dan ġejt fid-​dinja, biex nixhed għall-​verità.” (Ġwanni 18:37) Il-​verità għal Ġesù ma kinitx vaga, xi konċett li ma tifhmux. Hu wiegħed lid-​dixxipli tiegħu: “Tkunu tafu l-​verità, u l-​verità teħliskom.”​—Ġwanni 8:​32.

Fejn tistaʼ ssibha din il-​verità? F’okkażjoni minnhom, f’talba lil Alla, Ġesù qal: “Kelmtek hi l-​verità.” (Ġwanni 17:17) Il-​Bibbja, miktuba taħt ispirazzjoni divina, tirrivela verità li tipprovdi kemm gwida taʼ min joqgħod fuqha u kemm tama ċerta għall-​futur​—ħajja taʼ dejjem.​—2 Timotju 3:​15-​17.

Pilatu b’indifferenza rrifjuta l-​opportunità li jitgħallem din il-​verità. Xi ngħidu dwarek? Għala ma tistaqsix lix-​Xhieda taʼ Ġeħova x’inhi “l-​verità” li Ġesù għallem dwarha? Huma se jkunu ferħanin li jaqsmu din il-​verità miegħek.