“Xhud Fidil fis-​Sema”

IL-​POETI u l-​kittieba tal-​lirika taʼ l-​għanjiet ilhom ħafna żmien jagħtu tifħir lill-​qamar bħala oġġett taʼ sbuħija. Per eżempju, għanja ispirata minn Alla titkellem dwar mara li hi “sabiħa donnha l-​qamar.” (Għanja taʼ l-​Għanjiet 6:​10) Ukoll, salmista poetikament isejjaħ lill-​qamar “xhud fidil fis-​sema.” (Salm 89:​37, KŻ) X’inhu s-​sinifikat taʼ din l-​espressjoni rigward il-​qamar?

Il-qamar, mingħajr qatt ma jfalli, idur fl-​orbita tiegħu dawra sħiħa madwar id-​dinja kull 27.3 ġurnata. Għalhekk, il-​lealtà tal-​qamar tistaʼ tirreferi għal kemm tistaʼ toqgħod fuqu. Madankollu, is-​salmista setaʼ kellu f’moħħu tifsira ħafna iktar profonda. Hu sejjaħ lill-​qamar “xhud fidil” f’għanja profetika dwar is-​Saltna li Ġesù għallem lis-​segwaċi tiegħu biex jitolbu għaliha.​—Mattew 6:​9, 10.

Iktar minn 3,000 sena ilu, Alla Ġeħova għamel il-​patt tas-​Saltna mas-​Sultan David taʼ Iżrael tal-​qedem. (2 Samwel 7:​12-​16) L-​iskop taʼ dan il-​patt kien biex jipprovdi bażi legali għal Ġesù Kristu, bħala l-​werriet taʼ David, biex ikollu pussess tat-​tron għal dejjem. (Isaija 9:6 [9:​7, NW]; Luqa 1:​32, 33) Billi rrefera għat-​tron tan-​“nisel” taʼ David, is-​salmista għanna: “Iżomm sħiħ għal dejjem bħall-​qamar, u bħal xhud fidil fis-​sema.”​—Salm 89:​36, 37, KŻ.

‘Id-​dawwala biex taħkem fuq il-​lejl’​—il-​qamar​—hija tfakkira adattata dwar il-​ħakma permanenti taʼ Kristu. (Ġenesi 1:​16, Saydon) Rigward is-​Saltna tiegħu, Danjel 7:​14 jgħid: “Ħakmietu ħakma għal dejjem li ma tgħaddix, u saltnatu li ma tinqeridx.” Il-​qamar huwa xhud li jfakkarna dwar din is-​Saltna u l-​barkiet li se ssawwab fuq l-​umanità.

[Sors tal-Istampa f’paġna 32]

Qamar: NASA photo