Ħafna Iktar Importanti mit-​Temp

KWAŻI kull pajjiż għandu xi proverbju dwar it-​temp: Ħmura taʼ fil-​għaxija lesti l-​bhejjem għat-​tiġrija; ħmura taʼ fil-​għodu, lesti fejn joqogħdu. Illum, il-​meteorologi jagħtu raġunijiet tekniċi għala l-​kundizzjonijiet tat-​temp taʼ fil-​għodu x’aktarx li jiżviluppaw bħalma jgħid il-​proverbju.

Bl-istess mod, fi żmien Ġesù, in-​nies kellhom id-​drawwa li jistudjaw is-​sema u jinterpretaw id-​dehra tiegħu. Ġesù qal lil xi Lhud: “Meta jasal fil-​għaxija intom imdorrijin tgħidu, ‘Se jkun temp sabiħ, għax is-​sema aħmar nar’; u fil-​għodu, ‘Se jkun temp ikrah u bix-​xita llum, għax is-​sema aħmar nar, imma mdallam.’ Intom tafu tinterpretaw id-​dehra tas-​sema imma . . . ” Imma xiex? Ġesù kompla bi stqarrija mhux tas-​soltu: “Imma ma tafux tinterpretaw is-​sinjali taż-​żminijiet.”​—Mattew 16:​2, 3.

X’kienu dawn “is-​sinjali taż-​żminijiet”? Dawn kienu l-​ħafna indikazzjonijiet ċari li Ġesù kien il-​Messija mibgħut minn Alla. L-​azzjonijiet tiegħu kienu jidhru ċari daqskemm kienet ċara l-​ħmura fis-​sema. Madankollu, ħafna mil-​Lhud injoraw is-​sinjali li wrew li l-​Messija kien wasal​—żvilupp li ċertament kien iktar importanti mit-​temp.

Illum, ukoll, hemm sinjal li hu bil-​wisq iktar importanti li tifhem mill-​kulur tas-​sema letterali. Ġesù bassar li din id-​dinja ħażina se tinġieb fix-​xejn sabiex ikun hemm bidu taʼ dinja aħjar. Hu semma għadd taʼ żviluppi li flimkien kienu se juru meta din il-​bidla kienet se sseħħ. Fost dawn hemm gwerer u ġuħ globali. Ġesù qal li meta jidhru dawn l-​affarijiet, ikun qorob iż-​żmien biex Alla jintervieni.​—Mattew 24:​3-​21.

Qiegħed int tara “s-​sinjali taż-​żminijiet”?