Ibati minn Diżabilità Imma Ħerqan biex Jaqdi

META tiltaqaʼ għall-​ewwel darba maʼ Leonardo, għandek mnejn ma tqisux bħala li hu kwalifikat biex jaħdem fil-​bini. Hu ma jistaʼ juża ebda waħda minn idejh, minħabba li tilifhom xi żmien ilu f’aċċident fuq ix-​xogħol. Però, minkejja d-​diżabilità li għandu, Leonardo kien qed jaħdem iebes fuq proġett tal-​bini f’Acajutla, El Salvador, kif tistaʼ tara fl-​istampa.

Sabiex jieħu sehem f’dan il-​proġett tal-​bini, Leonardo ħejja għodda apposta għalih. Hu jdaħħal il-​parti t’isfel taʼ driegħu tal-​lemin f’ħolqa tal-​ħadid imwaħħla mat-​tarf taʼ pala u bis-​sengħa jiġbor it-​terrapien f’karretta. Minflok ma jaqbad il-​karretta b’idejh, hu waħħal ħoloq mal-​pumi ħalli jkun jistaʼ jimbotta l-​karretta waħdu. X’qanqlu jieħu sehem f’dan il-​proġett?

Leonardo ried jieħu sehem fil-​bini taʼ Sala tas-​Saltna, jew il-​post taʼ qima għall-​kongregazzjoni lokali tax-​Xhieda taʼ Ġeħova. Kellu ħafna raġunijiet għalxiex setaʼ jiskuża ruħu milli jieħu sehem fix-​xogħol tal-​bini. Hu kien impjegat full-time, kellu diżabilità, u kien diġà qed jaqdi fil-​kongregazzjoni tiegħu bħala qaddej ministerjali. Madankollu, hu ried jagħmel kulma setaʼ biex jaqdi lil Alla fil-​post tal-​kostruzzjoni wkoll.

Għandek int l-​istess attitudni fis-​servizz tiegħek lil Alla? Minflok m’uża d-​diżabilità tiegħu bħala skuża, Leonardo uża l-​fakultà mentali tiegħu biex jivvinta għodda apposta li mingħajrha kieku ma jkunx jistaʼ jagħmel ix-​xogħol. Hu kien qed jaqdi lil Alla ‘b’moħħu kollu.’ (Mattew 22:37) Kemm jekk diżabilitati u kemm jekk le, il-​ħaddiema li jieħdu sehem fil-​bini tas-​Swali tas-​Saltna tax-​Xhieda taʼ Ġeħova madwar id-​dinja għandhom spirtu volontarju. Il-​laqgħat tagħhom huma miftuħin għall-​pubbliku, u int mistieden mill-​qalb biex tattendi.