Veru Faċli, Iżda Hija Eżatta?

F’SETTEMBRU taʼ l-​2005, il-​Knisja taʼ l-​Ingilterra b’entużjażmu approvat il-​ħarġa taʼ Bibbja bl-​isem, The 100-Minute Bible. Bl-​għan li tinqara f’100 minuta, il-​verżjoni l-​ġdida tiġbor fil-​qosor l-​Iskrittura Ebrajka fi 17-il sezzjoni taʼ paġna għal kull sezzjoni u l-​Iskrittura Griega fi 33 sezzjoni, u b’hekk tħalli barra, bħalma jpoġġiha wieħed kritiku “dawk is-​siltiet li m’humiex interessanti.” Veru faċli biex taqraha, iżda hija eżatta?

Barra mill-​fatt li l-​isem qaddis, Ġeħova, tħalla barra, ammont taʼ tagħwiġ ieħor se jiġi notat minn studenti serji tal-​Bibbja. (Salm 83:​18, Karm Żammit) Per eżempju, fl-​ewwel sezzjoni nsibu li Alla “ħalaq is-​smewwiet u l-​art f’perijodu taʼ sitt ijiem.” Però, Ġenesi 1:1 sempliċement jgħid: “Fil-​bidu Alla ħalaq is-​sema u l-​art.” Wara dan, ir-​rakkont oriġinali jiddeskrivi iktar azzjonijiet taʼ ħolqien li jinvolvu l-​art, li damu sitt ‘ijiem,’ jew perijodi taʼ żmien. Imbagħad, Ġenesi 2:4 (KŻ) jiġbor fil-​qosor il-​perijodu kollu tal-​ħolqien, billi jirreferi għalih bħala “l-​jum meta l-​Mulej Alla għamel l-​art u s-​smewwiet.”

Skond The 100-Minute Bible, Ġob, raġel taʼ integrità, ġie attakkat minn “wieħed mill-​qaddejja [t’Alla], Satana, . . . li r-​responsabbiltà tiegħu kienet li jaġixxi bħala l-​akkużatur taʼ l-​umanità.” Qiegħed tinnota d-​diskrepanza hawnhekk? Il-​kelma “Satana” tfisser “Avversarju.” Minflok ma huwa l-​qaddej t’Alla, Satana huwa, fil-​fatt, l-​akbar għadu t’Alla li ħatar lilu nnifsu bħala l-​akkużatur taʼ l-​umanità.​—Rivelazzjoni 12:7-​10.

Xi ngħidu għall-​porzjon taʼ l-​Iskrittura Griega Kristjana taʼ The 100-Minute Bible? Fil-​parabbola tan-​nagħaġ u l-​mogħoż, il-​verżjoni l-​ġdida tgħid li Ġesù jiffavorixxi lil dawk li taw l-​għajnuna tagħhom “lil xi ħadd, hi kemm hi insinifikanti,” filwaqt li Ġesù fil-​fatt qal li hu jbierek lil dawk li jagħmlu t-​tajjeb maʼ dawk li qed jimxu fuq il-​passi tiegħu​—‘ħutu.’ (Mattew 25:40) Il-​ġabra fil-​qosor taʼ Rivelazzjoni tgħid lill-​qarrejja tagħha li “Ruma, Babilonja l-​kbira, se tkun kompletament meqruda.” Madankollu, l-​istudenti tal-​Bibbja jafu li m’hemm xejn fil-​kitbiet oriġinali li jagħtu identità bħal din lil Babilonja l-​Kbira.”​—Rivelazzjoni 17:15–​18:24.

Għal dawk li qed ifittxu biex isiru jafu lill-​Ħallieq tagħna u jifhmu l-​iskop tiegħu, ma jistaʼ jkun hemm l-​ebda sostitut għall-​Bibbja sħiħa. Huwa veru, biex taqra l-​Bibbja se tieħu ħafna iktar minn 100 minuta, iżda jekk tagħmel hekk se jkollok barkiet imprezzabbli. (Ġwanni 17:3) Jalla int taċċetta din l-​isfida u taħsad il-​barkiet għalik innifsek. ​—2 Timotju 3:​16, 17.