Is-​Suċċess—Kif Tkejlu?

JESSE LIVERMORE, li xi wħud iqisuh bħala wieħed mill-​iktar negozjanti taʼ l-​ishma f’Wall Street li qatt irnexxa, kien magħruf għad-​deċiżjonijiet għaqlin li kien jieħu fin-​negozju. Minħabba f’hekk, hu akkwista ħafna għana. Hu kien jilbes ilbiesi mill-​aqwa meħjutin bl-​idejn, jgħix f’villa b’29 kamra, u jirkeb f’Rolls-Royce sewda misjuqa minn xufier.

Davida kien qed jgħix ħajja simili. Bħala viċi-president u maniġer ġenerali taʼ kumpanija kbira tal-​grafika, hu setaʼ jsir president taʼ parti mill-​kumpanija. L-​għana u l-​prestiġju għoġbuh. Però, David ħa deċiżjoni persunali li jirriżenja mill-​kumpanija. “Jien naf li qatt ma se jerġaʼ jkolli karriera esekuttiva f’pożizzjoni daqshekk għolja,” qal David. Taħseb li David għamel żball?

Ħafna jemmnu li s-​suċċess jinvolvi li individwu jikseb l-​għana, il-​fama, jew il-​prominenza. Madankollu, dawk li jgawdu l-​prosperità materjali xorta jħossuhom vojta minn ġewwa u jħossu li m’għandhomx sinifikat u skop fil-​ħajja. Jidher ċar li din kienet is-​sitwazzjoni tas-​Sur Livermore. Minkejja l-​għana li kellu, hu għex ħajja kollha qsim il-​qalb, traġedji, u niket. Hu esperjenza dipressjoni, żwiġijiet imkissrin, u relazzjonijiet bierda maʼ wliedu. Fl-​aħħar, wara li tilef ħafna minn ġidu, ġurnata minnhom is-​Sur Livermore poġġa bil-​qiegħda f’ħanut tax-​xorb taʼ lukanda lussuża u lmenta dwar it-​telf tiegħu. Hu ordna cocktail, ħareġ ktieb żgħir tal-​ġilda fejn kien jikteb in-​noti, u ħejja nota li fiha kiteb l-​aħħar tislima lil martu. Wara li xorob il-​cocktail, hu daħal f’kamra mdallma fejn jiddendlu l-​kowtijiet u qatel lilu nnifsu b’mod traġiku.

Għalkemm huwa minnu li l-​kaġuni taʼ suwiċidju huma komplikati, din l-​esperjenza turi kemm hu minnu dak li tgħid il-​Bibbja: “Dawk li huma determinati li jsiru għonja . . . ferew lilhom infushom b’ħafna weġgħat.”​—1 Timotju 6:​9, 10.

Jistaʼ jkun possibbli li dawk li jkejlu s-​suċċess skond l-​għana, il-​pożizzjoni, jew il-​prominenza jkunu qed jużaw kejl difettuż? Tħoss li int individwu li għandek suċċess? Għala? Liema livell tuża biex tara jekk dan huwiex minnu? X’jeffettwa l-​ħarsa tiegħek lejn is-​suċċess? L-​artiklu li jmiss jeżamina parir effettiv li għen lil miljuni taʼ nies biex ikollhom suċċess. Ejja naraw kif int ukoll jistaʼ jkollok suċċess.

[Nota taʼ taħt]