“Mil-​Lum ’il Quddiem Se Nemmen li Alla Jeżisti”

ALEXANDRA, waħda mara Ukranjana li tgħix Praga, fir-​Repubblika Ċeka, kienet fi triqitha lejn id-​dar wara x-​xogħol. Hekk kif kienet qed tistenna t-​tramm, hi nnotat portafoll żgħir maʼ l-​art jintefaʼ ’l hawn u ’l hinn minn saqajn in-​nies li kienu għaddejjin. Meta ġabret il-​portafoll u rat x’kien fih, ma setgħetx temmen dak li rat. Kien hemm mazz flus taʼ 5,000 koruna (Lm52)! Ħadd ma deher li kien qed ifittex il-​portafoll. Bħala mara barranija li tgħix fir-​Repubblika Ċeka, ma kienx faċli għal Alexandra li taqlaʼ l-​għajxien tagħha. X’kienet se tagħmel?

Wara li marret lura d-​dar, Alexandra wriet il-​portafoll lil bintha, Victoria. Huma fittxew fil-​portafoll għall-​isem u l-​indirizz tas-​sid, iżda kien kollu għalxejn. Madankollu, ġol-​portafoll kien hemm biċċa karta bi ftit numri miktubin fuqha. Fuq naħa waħda kien hemm imniżżel numru taʼ kont tal-​bank, u fuq in-​naħa l-​oħra, iktar numri. Fil-​portafoll kien hemm ukoll id-​direzzjonijiet għall-​bank lokali u nota li fuqha kien hemm imniżżel “330,000 koruna” (madwar Lm3,200). Dan kien l-​ammont eżatt li kien fih il-​portafoll.

Alexandra pprovat iċċempel fuq numru li kien jidher qisu numru tat-​telefon, imma ma rnexxilhiex tikkuntattja l-​bank. Għalhekk, hi u bintha marru l-​bank u spjegaw x’kien ġara. Huma staqsew dwar in-​numru tal-​kont li kienu sabu fil-​portafoll. Madankollu, dan il-​kont ma kienx imniżżel fir-​rekord tal-​bank. L-​għada, Alexandra marret lura bin-​numru l-​ieħor li kien fil-​portafoll, u fil-​fatt, il-​bank kellu klijenta b’dan in-​numru tal-​kont. Alexandra u Victoria kkuntattjaw lill-​mara, u hi vverifikat li kienet tilfitu. Fl-​aħħar, meta lkoll iltaqgħu, il-​mara rringrazzjathom mill-​qalb u staqsiethom, “Kif se npattilkom lura talli rritornajtu l-​flus?”

Victoria wieġbet: “M’hemmx għalfejn. Kieku ridna l-​flus, konna nżommuhom.” Bil-​ftit Ċek li taf, hi spjegat: “Qed nirritornawlek il-​flus għax aħna Xhieda taʼ Ġeħova. Il-​kuxjenza tagħna mħarrġa minn fuq il-​Bibbja ma tippermettilniex li nżommu dak li mhux tagħna.” (Ebrej 13:18) Bil-​ferħ, il-​mara qalet, “Mil-​lum ’il quddiem se nemmen li Alla jeżisti.”