“L-​Aħjar Tmiem li Qatt Stajt Nimmaġina”

GĦALLIEM fi skola sekondarja ġo Spanja kiteb: “Għal iktar minn mitt sena, ix-​Xhieda taʼ Ġeħova wrew solidarjetà taʼ veru, onestà li ħadd ma jistaʼ jsib x’jgħid fiha, u fuq kollox, fidi li ma titħarrikx.” X’qanqal lil dan l-​għalliem​—li huwa ateu​—biex jagħmel stqarrija bħal din?

Dan kollu beda meta Noemí, waħda mix-​Xhieda taʼĠeħova u studenta fi skola sekondarja, kellha tagħmel komponiment bħala parti mill-​eżami finali taʼ l-​istudji skolastiċi tagħha. Hi ddeċidiet li tiżviluppa t-​tema “It-​Trijangli Vjola Taħt il-​Ħakma Nazista.”

Għalfejn għażlet dik it-​tema? Noemí tispjega: “Peress li kien se jkun hemm għalliem li jara x-​xogħol tiegħi, ħsibt li jkun tajjeb li nieħu din l-​opportunità biex nagħtih xiehda. L-​istorja taʼ kif ix-​Xhieda taʼ Ġeħova fil-​Ġermanja Nazista kienu baqgħu leali lejn il-​prinċipji tagħhom kienet messitli qalbi. Għalhekk, ħsibt li din kienet se tmiss qalb oħrajn ukoll.”

Ix-xogħol taʼ Noemí kellu effett fuq iktar nies milli qatt setgħet ħasbet. Fil-​5 t’Ottubru, 2002, il-​komponiment tagħha rċieva premju f’kompetizzjoni nazzjonali għar-​riċerka fuq ix-​xjenza u l-​għemejjel tal-​bniedem. Il-​premjijiet għal dik il-​kompetizzjoni kienu mogħtija minn ġurija komposta minn 20 skular minn universitajiet Spanjoli prominenti.

Noemí rċiviet il-​premju tagħha mingħand Pilar del Castillo, il-​ministru Spanjol taʼ l-​edukazzjoni. Noemí ħatfet l-​opportunità biex lill-​ministru tagħtih kopja tal-​vidjo Jehovah’s Witnesses Stand Firm Against Nazi Assault (Ix-Xhieda taʼ Ġeħova Jieqfu Sodi Kontra l-​Attakki tan-​Nazi). Il-​ministru laqaʼ r-​rigal minn qalbu.

Lura f’Manresa, il-​belt fejn toqgħod Noemí, is-​suċċess akkademiku tagħha deher fil-​gazzetta lokali fejn ġiet riveduta l-​informazzjoni tal-​komponiment tagħha. Sadanittant, is-​surmast taʼ l-​iskola tagħha talabha kopja tal-​komponiment sabiex ikun jistaʼ jinkludih fi programm taʼ kommemorazzjoni għall-​75 anniversarju taʼ l-​iskola.

“Dan huwa l-​aħjar tmiem li qatt stajt nimmaġina għall-​istudji tiegħi fl-​iskola sekondarja,” tgħid Noemí. “Tgħidx kemm fraħt meta qrajt il-​kliem li l-​għalliem tiegħi, is-​Sur Jorge Tomás Calot, kiteb bħala parti mill-​introduzzjoni tiegħu għar-​rapport tiegħi:

“Jien ateu, imma nixtieq li nkun konvint bis-​sħiħ mill-​eżistenza taʼ dan l-​Esseri Suprem, li jispira fl-​aduraturi tiegħu l-​iktar ‘imħabba [ġenwina] għall-​proxxmu.’”