Good News for People of All Nations

HAWN fuq jidher il-​ktejjeb li ħareġ fil-​Konvenzjonijiet Distrettwali tax-​Xhieda taʼ Ġeħova għas-​sena 2004/05 bit-​tema “Imxi m’Alla.” Edizzjoni minnhom fiha 96 paġna b’messaġġ qasir bi 92 lingwa, li jibda mill-​Afrikaans saż-​Żulu, u huwa disinjat biex jgħin ħalli tinxtered l-​aħbar tajba tas-​Saltna maʼ kemm jistaʼ jkun nies. (Mattew 24:14) L-​esperjenzi li ġejjin juru r-​riżultati li spiss ikun hemm meta jintuża l-​ktejjeb.

• Wara li rċiviet il-​ktejjeb fil-​konvenzjoni, familja waħda taʼ Xhieda marret iżżur tliet parkijiet nazzjonali. Hemmhekk iltaqgħet maʼ nies mill-​Filippini, l-​Indja, l-​Olanda, u l-​Pakistan. Ir-​raġel innota: “Għalkemm dawn in-​nies kollha kienu jitkellmu ftit bl-​Ingliż, huma baqgħu impressjonati meta wrejniehom il-​messaġġ bil-​lingwa tagħhom stess, ladarba huma kienu eluf taʼ kilometri ’l bogħod minn pajjiżhom. Huma raw b’mod ċar l-​aspett globali tax-​xogħol tagħna kif ukoll l-​unità taʼ bejnietna.”

• Waħda Xhud uriet il-​ktejjeb lil kollega tagħha tax-​xogħol li kien mill-​Indja. Dan feraħ meta ra l-​lingwi kollha li kien hemm fih u qara l-​messaġġ bil-​lingwa tiegħu stess. Dan wassal għal iktar diskussjonijiet fuq il-​Bibbja. Kollega oħra mill-​Filippini baqgħet skantata meta sabet il-​lingwa tagħha fil-​ktejjeb u interessat ruħha biex titgħallem iżjed dwar ix-​Xhieda taʼ Ġeħova.

• Fil-Kanada, mara min-​Nepal qablet li tistudja l-​Bibbja fuq it-​telefon maʼ Xhud, imma żammet lura milli tistieden lill-​oħt biex iżżurha f’darha. Madankollu, wara li x-​Xhud qalet lill-​mara li għandha ktejjeb li fih messaġġ bin-​Nepaliż, hi bil-​ferħ stiednet lill-​oħt biex tmur għandha. Hi verament xtaqet tara b’għajnejha stess il-​messaġġ bi lsien pajjiżha! Minn dakinhar ’l hawn, l-​istudju beda jinżamm fid-​dar tal-​mara.