Jaqsmu l-​Aħbar Tajba maʼ Dawk Neqsin mis-​Smigħ

“IĠIBULKOM l-​ispiritwalità!” Dan hu kif direttur taʼ dar taʼ l-​anzjani f’Navalcarnero, f’Madrid, Spanja, reċentement iddeskriva ż-​żjajjar li x-​Xhieda taʼ Ġeħova jagħmlu fiċ-​ċentru tiegħu. X’ġagħlu jgħid hekk?

Xi wħud mir-​residenti taċ-​ċentru Rosas del Camino huma neqsin mis-​smigħ. Madankollu, ladarba x-​Xhieda taʼ Ġeħova għamlu sforz biex jitgħallmu l-​Lingwa tas-​Sinjali bl-​Ispanjol, huma jistgħu jikkomunikaw maʼ dawn ir-​residenti. Id-​direttur faħħar lix-​Xhieda talli bla ħlas huma jagħtu mill-​ħin tagħhom sabiex jgħallmu valuri spiritwali lil dawk li huma fil-​bżonn. Hu osserva l-​effett pożittiv li t-​tagħlim taʼ l-​aħbar tajba tas-​Saltna kellu fuq ir-​residenti. U r-​residenti—speċjalment dawk li huma neqsin mid-​dawl jew mis-​smigħ—ukoll japprezzaw ħafna ż-​żjajjar tax-​Xhieda.

Eulogio, wieħed mir-​residenti li hu nieqes mid-​dawl u mis-​smigħ, issa qed jistudja l-​Bibbja max-​Xhieda taʼ Ġeħova. Ġurnata minnhom waqt li kienu qed jagħmlu l-​istudju, ġie wieħed anzjan u offra lix-​Xhud poeżija li r-​residenti kienu kitbu biex jesprimu l-​gratitudni tagħhom. Il-​poeżija kienet intitolata “Li Tkun Xhud.” Biċċa minnha kienet tgħid: “Jgħixu ħajja tajba u dixxiplinata sew, u minn Ġeħova jiksbu għerf li jġibilhom l-​hena. Huma jmorru u jerġgħu jmorru fid-​djar għax jafdaw f’Ġeħova.”

Hija eżattament din il-​fiduċja f’Ġeħova li wasslet lil ħafna Xhieda minn madwar id-​dinja kollha biex jitgħallmu l-​lingwa tas-​sinjali taʼ dawk li huma neqsin mis-​smigħ fil-​pajjiż tagħhom. B’dan il-​mod huma jistgħu jaqsmu l-​messaġġ inkuraġġanti taʼ tama li jinsab fil-​Bibbja maʼ dawn l-​uħud.