Proklamaturi tas-​Saltna Jirrapportaw

BIĊĊA art kbira fil-​qalba taʼ l-​Awstralja hija magħrufa b’għożża bħala l-​post iżolat. F’xi nħawi f’dan il-​post imwarrab ilha ma tingħata xiehda għal dawn l-​aħħar 12-il sena. Allura x-​Xhieda taʼ Ġeħova f’Darwin, il-​belt kapitali fit-​Territorju tat-​Tramuntana, organizzaw kampanja intensiva taʼ disat ijiem biex jippridkaw u jsibu lil dawk li jistħoqqilhom.​—Mattew 10:11.

Bdew isiru pjanijiet bir-​reqqa minn sena qabel il-​kampanja fosthom tħejjew mapep li jkopru iktar minn 800,000 kilometru kwadru​—territorju tliet darbiet akbar minn New Zealand. Biex tieħu idea taʼ kemm huwa kbir dan it-​territorju mwarrab, immaġina li triq normali li twassal għal dar f’razzett kbir hija twila iktar minn 30 kilometru mill-​bidu tagħha sal-​bieb prinċipali tad-​dar! Iktar minn hekk, xi rziezet huma 300 kilometru jew iktar ’il bogħod minn xulxin.

Total taʼ 145 xhud volontier ħadu sehem fil-​kampanja. Xi wħud ġew mill-​bogħod, saħansitra mit-​Tasmanja. Oħrajn ġew bil-​karozzi li jingranaw fl-​erbaʼ roti u li kienu mgħobbijin bil-​kampijiet, spare parts, u petrol. Oħrajn irmonkaw l-​armar tagħhom bit-​trejler. Minbarra dan, inkrew żewġ karozzi tal-​linja li jesgħu 22 passiġġier kull waħda biex jgħabbu lil dawk li ma kellhomx karozzi addattati. Dawk li vvjaġġaw bil-​karozza tal-​linja kkonċentraw fuq li jagħtu xiehda lill-​abitanti tal-​villaġġi ż-​żgħar fit-​territorju li ngħataw.

Qabel ma bdew il-​vjaġġ, l-​aħwa responsabbli ppreparaw taħditiet u turijiet biex jintwera kif għandha tiġi preżentata l-​aħbar tajba f’dan it-​territorju mhux tas-​soltu. Per eżempju, normalment biex tippriedka f’komunitajiet taʼ l-​Aboriġini b’mod effettiv jeħtieġ li ssegwi ċertu protokoll, jew regoli taʼ l-​imġiba, u trid tkun familjari mad-​drawwiet taʼ l-​Aboriġini. Affarijiet li għandhom x’jaqsmu maʼ l-​ambjent ġew diskussi wkoll biex tiġi mħarsa n-​natura.

Il-pubblikaturi gawdew ħafna esperjenzi impressjonanti. Per eżempju, f’post wieħed fejn jgħixu l-​Aboriġini, l-​aħwa ħadu ħsieb li tingħata taħdita pubblika bbażata fuq il-​Bibbja. Il-​mara li kienet qed tmexxi l-​komunità marret personalment tavża lin-​nies dwar dan. Wara dan, tħallew 5 kotba u 41 browxer maʼ dawk li attendew. F’post ieħor, ġie kuntattjat Aboriġinu. Hu saħansitra kellu l-​Bibbja tiegħu stess, il-​King James Version, imma kienet qadima u mqattgħa. Meta staqsewh jekk kienx jaf l-​isem t’Alla, hu wieġeb iva u mbagħad ħareġ rivista antika tat-​Torri taʼ l-​Għassa mill-​but tal-​ġakketta tiegħu. Hu qara minnha u kkwota Marku 12:​30, li tgħid: “Ħobb lil Ġeħova Alla tiegħek b’qalbek kollha.” Hu qal, “Verament togħġobni din l-​iskrittura.” Wara diskussjoni twila minn fuq il-​Bibbja, hu aċċetta Bibbja ġdida u letteratura oħra bbażata fuq il-​Bibbja.

Ħdejn il-​Golf tal-​Carpentaria, il-​kap taʼ razzett kbir taʼ 400,000 ettaru wera daqsxejn interess fil-​messaġġ tas-​Saltna. Meta ntwera l-​pubblikazzjonijiet Il-​Ktieb Tiegħi taʼ Stejjer mill-​Bibbja u Għarfien li Jwassal għal Ħajja taʼ Dejjem,a hu staqsa jekk kienx hemm letteratura disponibbli bil-​lingwa tal-​Kriol. Dan ma kienx normali għaliex għalkemm ħafna Aboriġini jitkellmu bil-​Kriol, ftit jafu jaqrawh. Imma sirna nafu li l-​50 ħaddiem f’dak ir-​razzett kollha kienu jafu jaqraw bil-​Kriol. Id-​direttur tgħidx kemm feraħ li kiseb letteratura Biblika bil-​Kriol, u bil-​qalb aċċetta li jagħtihom in-​numru tat-​telefon sabiex ikunu jistgħu jikkuntattjawh.

Matul id-​disat ijiem t’għoti taʼ xiehda intensiva, tħallew total taʼ 120 Bibbja, 770 ktieb, 705 rivisti, u 1,965 browxer. Iktar minn hekk, saru 720 żjara lura, u nbdew 215 -il studju tal-​Bibbja.

Ċertament, il-​ġuħ spiritwali taʼ ħafna wħud li jixirqilhom u li huma mxerrdin madwar dan il-​post kbir fl-​aħħar ġie sodisfat.​—Mattew 5:6.

[Nota taʼ taħt]

[Mappa f’paġna 30]

(Għall-formazzjoni sħiħa tat-test, ara pubblikazzjoni)

AWSTRALJA

IT-​TERRITORJU TAT-​TRAMUNTANA

Darwin

Il-​Golf tal-​ Carpentaria

Sydney

TASMANJA