“X’Inhu s-​Sigriet Tiegħek?”

DIN kienet il-​mistoqsija li biha wieħed stranġier imdaħħal fiż-​żmien issorprenda lil Muriel, omm taʼ tlett itfal, waqt li kienu ġo restorant. Muriel kienet imħabbta b’ħafna appuntamenti mat-​tobba minħabba t-​tfal tagħha, u ma kinitx qed tlaħħaq maʼ l-​iskeda tagħha. Ma kienx hemm biżżejjed ħin biex imorru d-​dar u jieklu qabel ma jmorru l-​laqgħa Kristjana tagħhom. Għalhekk, ħadet it-​tfal f’restorant fil-​qrib sabiex ikunu jistgħu jieklu xi ħaġa.

Hekk kif kienu qed jispiċċaw jieklu, wieħed raġel resaq lejn Muriel u qalilha: “Ilni nosservak minn mindu dħalt hawn ġew. U nnotajt li t-​tfal tiegħek huma differenti ħafna minn dawk li s-​soltu niltaqaʼ magħhom. Trid tara x’jagħmlu t-​tfal bl-​imwejjed u s-​siġġijiet. Saqajhom itellgħuhom fuq l-​imwejjed. Is-​siġġijiet ikaxkruhom maʼ kullimkien. Imma t-​tfal tiegħek huma verament kwieti u għandhom manjieri tajbin. X’inhu s-​sigriet tiegħek?”

Muriel wieġbet: “Jien u r-​raġel nistudjaw il-​Bibbja regolarment mat-​tfal tagħna, u nipprovaw napplikaw f’ħajjitna dak li nitgħallmu. Aħna Xhieda taʼ Ġeħova.” Għal dan, ir-​raġel qalilha: “Jien Lhudi u salvajt mill-​Olokawst. Niftakar nara x-​Xhieda taʼ Ġeħova jiġu persegwitati fil-​Ġermanja. Anki dak iż-​żmien kienu jidhru li huma differenti. L-​imġiba tat-​tfal tiegħek verament impressjonatni. Irrid insir naf iktar dwar ir-​reliġjon tagħkom.”

Il-Bibbja hija gwida eċċellenti dwar it-​trobbija tat-​tfal. Ix-​Xhieda taʼ Ġeħova jixtiequ verament jgħinu lil oħrajn jibbenefikaw mill-​gwida li tinsab fl-​Iskrittura. Nistidnuk mill-​qalb taċċetta l-​offerta li ġejja.