Ħin l-​Ikel—Iktar minn Sempliċi Ħin biex Tiekol!

KULĦADD jieħu gost b’ikla tajba. Jekk maʼ l-​ikla jkun hemm konversazzjoni tajba u sħubija ħelwa man-​nies li nħobbu, din se ssir okkażjoni li nitgħaxxqu biha u li tissodisfalna ħafna iktar mill-​ġuħ biss. Ħafna familji jiħduha drawwa li mill-​inqas darba kuljum jinġabru biex jieklu flimkien. Il-​ħin taʼ l-​ikel jagħti l-​opportunità lill-​familja biex tiddiskuti l-​ġrajjiet jew il-​pjanijiet tal-​ġurnata. Il-​ġenituri li jisimgħu dak li wliedhom għandhom xi jgħidu u kif jesprimu ruħhom ikunu jistgħu jieħdu idea tal-​ħsibijiet u s-​sentimenti tat-​tfal tagħhom. Maż-​żmien, is-​sħubija hienja u rilassata li titgawda waqt l-​ikel tnissel fil-​familja sens taʼ sigurtà, fiduċja, u mħabba li jagħmel lill-​familja iktar soda.

Illum, ħafna membri tal-​familja jinsabu mħabbtin u huma dejjem okkupati, u għalhekk isibuha diffiċli biex jiltaqgħu flimkien għal xi ikla. F’xi partijiet tad-​dinja, il-​kultura lokali hi kontra li familja tiekol flimkien jew saħansitra li l-​membri jkellmu ’l xulxin waqt l-​ikel. Familji oħrajn għandhom id-​drawwa li jixegħlu t-​televixin waqt l-​ikel, u għalhekk iċaħħdu lilhom infushom minn din il-​komunikazzjoni tant importanti.

Madankollu, il-​ġenituri Kristjani huma dejjem attenti biex isibu opportunitajiet ħalli jibnu lill-​familja tagħhom. (Proverbji 24:27) Ħafna żmien ilu, lill-​ġenituri ntqalilhom li waħda mill-​aqwa opportunitajiet biex jitkellmu maʼ wliedhom dwar dak li qal Alla kienet ‘meta jkunu f’darhom.’ (Dewteronomju 6:7) Meta regolarment joqogħdu bil-​qiegħda biex jieklu flimkien, il-​ġenituri jkollhom opportunità unika biex jikkultivaw f’uliedhom imħabba iktar qawwija għal Ġeħova u għall-​prinċipji ġusti tiegħu. Billi tikkultiva atmosfera hienja u rilassata, int tistaʼ tagħmel il-​ħin taʼ l-​ikel wieħed pjaċevoli u esperjenza li tibni għall-​familja tiegħek ukoll. Iva, ara li l-​ħin taʼ l-​ikel ikun iktar minn sempliċi ħin biex tiekol!