Il-​Logħob M’Huwiex Għalxejn

IT-​TFAL iħobbu jilagħbu. Imma l-​logħob “m’huwiex xi attività bla sens jew vojta,” jispjega l-​ktieb The Developing Child. “Milli jidher b’din l-​attività t-​tfal jiżviluppaw il-​ħarsa tagħhom lejn l-​affarijiet taʼ madwarhom.” Bil-​logħob, it-​tfal jitgħallmu jużaw is-​sensi tagħhom, jifhmu l-​ambjent taʼ madwarhom, u jagħmluha maʼ oħrajn.

Minn meta jkollhom erbaʼ snin jew ħamsa, it-​tfal jibdew jagħmluha taʼ adulti bħala parti mil-​logħob tagħhom. Ġesù darba tkellem dwar tfal li kienu qed jilagħbu. Xi wħud riedu jilagħbu taparsi qegħdin f’tieġ, oħrajn riedu jilagħbu taparsi f’funeral u, bħalma spiss jagħmlu t-​tfal, huma argumentaw bejniethom għaliex xi wħud ma ridux jieħdu sehem. (Mattew 11:16, 17) Dan it-​tip taʼ logħob jistaʼ jservi biex it-​tfal li jkunu qed jiżviluppaw inaqqxu f’moħħhom irwoli importanti.

It-tfal fl-​istampi qed jagħmluha taʼ għalliem tal-​Bibbja u student. M’humiex qed jikkonduċu studju tal-​Bibbja reali, imma l-​idea li jaqsmu l-​messaġġ tal-​Bibbja maʼ oħrajn hi ċara f’moħħhom. U din it-​tagħlima hija waħda importanti, għaliex Ġesù kkmanda lis-​segwaċi tiegħu biex jagħmlu dixxipli u jgħallmu lin-​nies iħarsu dak kollu li kien għallimhom.—Mattew 28:19, 20.

Il-ġenituri li wliedhom iħobbu jilagħbu taparsi qed jikkonduċu studji tal-​Bibbja, jagħtu t-​taħditiet, jew jippridkaw minn dar għal dar jistgħu bix-​xieraq iħossuhom sodisfatti bihom infushom. Ovvjament, it-​tfal jimitaw l-​affarijiet li jaraw lill-​kbar taʼ madwarhom jagħmlu. Il-​logħob tat-​tfal mill-​Bibbja jindika li huma qed jitrabbew “bit-​tip taʼ edukazzjoni u pariri li japprova l-​Mulej.”—Efesin 6:4, Charles B. Williams.

Jehovah irid li t-​tfal jieħdu sehem fil-​qima vera. Hu qal lil Mosè biex jinkludi lit-​“tfal” meta tinqara l-​Liġi. (Dewteronomju 31:12) Jekk iċ-​ċkejknin iħossuhom involuti, wisq probabbli dan se jidher fil-​logħob tagħhom. U t-​tfal li jagħmluha taʼ ministru t’Alla fil-​logħob ikunu qed jagħmlu l-​ewwel pass sabiex isiru wieħed tassew.