Fittxu u “Araw Ikunx Hemm Min Jixraqlu”

DAMASKU kienet belt sinjura fl-​ewwel seklu taʼ l-​Era Komuni tagħna. Imdawra b’ġonna tas-​siġar tal-​frott, kienet qisha oasi għall-​karwani li kienu jaslu mill-​pajjiżi fil-​lvant. Ftit taż-​żmien biss wara l-​mewt taʼ Ġesù Kristu, kien hemm kongregazzjoni Kristjana f’Damasku. Fost il-​membri tagħha kien hemm Lhud li għandhom mnejn saru segwaċi taʼ Ġesù matul il-​Festa taʼ Pentekoste f’Ġerusalemm fis-​sena 33 E.K. (Atti 2:5, 41) Jistaʼ jkun li xi dixxipli mil-​Lhudija marru joqogħdu Damasku meta faqqgħet il-​persekuzzjoni wara t-​tħaġġir taʼ Stiefnu.—Atti 8:1.

X’aktarx matul is-​sena 34 E.K., wieħed Kristjan minn Damasku jismu Ħananija rċieva inkarigu mhux tas-​soltu. Il-​Mulej qallu: “Qum u mur fit-​triq li jgħidulha d-​Dritta, u hemm, fid-​dar taʼ Ġuda, staqsi għal wieħed minn Tarsu, jismu Sawl. Dan qiegħed jitlob.”—Atti 9:11.

It-triq li jgħidulha d-​Dritta kienet twila madwar kilometru u nofs u kienet taqsam iċ-​ċentru taʼ Damasku. Mill-​istampa tas-​seklu 19 li għandna hawnhekk, nistgħu nieħdu idea taʼ kif kienet tidher it-​triq fiż-​żminijiet tal-​qedem. Minħabba l-​mod kif kienet magħmula, Ħananija x’aktarx li kellu jdum ifittex mhux ħażin sakemm isib id-​dar taʼ Ġuda. Madankollu, Ħananija sabha, u bis-​saħħa taż-​żjara tiegħu Sawlu sar l-​appostlu Pawlu, proklamatur żeluż taʼ l-​aħbar tajba.—Atti 9:12-19.

Ġesù kien bagħat lid-​dixxipli tiegħu u kien qalilhom biex ifittxu u ‘jaraw ikunx hemm min jixraqlu’ l-​aħbar tajba. (Mattew 10:11) Mid-​dehra, Ħananija fittex lil Sawlu letteralment. Bħal Ħananija, ix-​Xhieda taʼ Jehovah ifittxu bil-​ferħ lil dawk li jixirqilhom u jifirħu meta n-​nies jaċċettaw l-​aħbar tajba tas-​Saltna. L-​isforz kollu li jagħmlu ma jkunx għalxejn meta jsibu wħud bħal dawn.—1 Korintin 15:58.

[Stampa f’paġna 32]

“It-​triq li jgħidulha d-​Dritta” taʼ llum

[Sors tal-​Istampa f’paġna 32]

Mill-​ktieb La Tierra Santa, it-​tieni Volum, 1830