Riċetta għal Ħajja Twila u Hienja

“KULĦADD irid jibqaʼ ħaj; imma ħadd ma jrid jixjieħ.” Hekk jgħid proverbju Ġermaniż. Ħafna nies li jkunu waslu biex jirtiraw mix-​xogħol iħarsu ’l quddiem lejn li jkollhom iktar ħin għalihom infushom u inqas responsabbiltajiet. Iżda jibżgħu li jsiru bla skop fil-​ħajja u ma jkunu jiswew xejn. Jibżgħu wkoll li jispiċċaw waħedhom, imdejqin, u neqsin mis-​saħħa.

X’inhu, mela, is-​sigriet taʼ ħajja hienja? Ħbieb sinċieri u familja li turik imħabba jgħinu biex iġibu l-​hena kemm liż-​żgħar kif ukoll lill-​kbar. Imma l-​iktar li jgħodd m’huwiex x’jistgħu jagħmlu oħrajn biex itejbu l-​ħajja taʼ persuna anzjana. Saħansitra iktar importanti hu dak li l-​anzjan stess jistaʼ jagħmel għal oħrajn.

Studju li sar tul perijodu twil fuq 423 koppja anzjana jindika li l-​fatt li nkunu t’għajnuna fil-​ħajjiet t’oħrajn jistaʼ jgħin biex ħajjitna stess titwal. Stephanie Brown, li kkonduċiet l-​istudju, tispjega: “Dan li sibna jissuġġerixxi li m’huwiex dak li nieħdu mir-​relazzjonijiet li jagħmel il-​kuntatt m’oħrajn tant taʼ ġid; huwa dak li nagħtu.” Dan l-​għoti għandu mnejn jinkludi għajnuna fix-​xogħol tad-​dar, indokrar tat-​tfal, qadi, li nipprovdu trasport, jew li noqogħdu nisimgħu lil xi ħadd li jkollu bżonn jitkellem.

Madwar 2,000 sena ilu, Ġesù Kristu qal: “Min jagħti hu aktar hieni minn min jieħu.” (Atti 20:35) Ir-​riċetta għal ħajja twila u hienja ma tinstabx f’xi somma kbira l-​bank jew f’xi dieti u terapiji kontra x-​xjuħija. Pjuttost, tikkonsisti filli nibqgħu attivi u nagħtu mill-​ħin, l-​enerġija, u s-​saħħa tagħna biex intejbu l-​ħajjiet t’oħrajn.

Madankollu, m’huwiex biżżejjed li nagħtu biex ninħelsu mix-​xjuħija, mill-​mard, u mill-​mewt. Is-​Saltna t’Alla biss tistaʼ tneħħi għalkollox dawn l-​affarijiet. Taħt il-​ħakma tagħha, il-​mard se jispiċċa u saħansitra “ma jkunx hemm iżjed mewt.” (Apokalissi 21:3, 4; Isaija 33:24) Fil-​fatt, il-​bnedmin ubbidjenti se jgħixu għal dejjem henjin fuq l-​art magħmula ġenna. (Luqa 23:43) Ix-​Xhieda taʼ Jehovah huma kuntenti li jistgħu jagħtu lill-​oħrajn din ir-​riċetta bbażata fuq il-​Bibbja għal ħajja twila u hienja.