Qiegħed Int Tiżviluppa Sens taʼ Stagħġib?

QATT innotajt li l-​kittieba tal-​Bibbja kemm-il darba jqanqlu sens taʼ stagħġib meta jitkellmu dwar l-​għemejjel u l-​kwalitajiet t’Alla? “B’mod taʼ l-​għaġeb għamiltni,” qal is-​salmista. (Salm 139:14) “Mulej,” kiteb il-​profeta Isaija, “Alla tiegħi int; nfaħħrek u nsebbaħ lil ismek, għaliex għamilt ħwejjeġ taʼ l-​għaġeb.” (Isaija 25:1) Jew aħseb ftit dwar l-​istagħġib li esprima l-​appostlu Pawlu meta qal: “Kemm huma kbar l-​għana, l-​għerf u l-​għaqal taʼ Alla!”—Rumani 11:33.

Il-kelma “stagħġib” tistaʼ tiġi spjegata bħala emozzjoni mqanqla minn xi ħaġa mhux mistennija, mhux tas-​soltu, jew li ma tistax tiġi spjegata, speċjalment sorpriża mħallta b’ammirazzjoni jew kurżità, eċċetra.

Ma tiħux pjaċir meta tara lit-​tfal żgħar jiftħu għajnejhom beraħ bl-​istagħġib meta jaraw, iħossu, jew jisimgħu xi ħaġa ġdida għalihom? B’dispjaċir, dan l-​istagħġib imqanqal mill-​kurżità jew minn xi ħaġa ġdida li jesperjenzaw, taʼ spiss jonqos iktar ma jikbru.

Madankollu, għall-​kittieba Bibliċi li għadhom kemm issemmew, is-​sentiment taʼ stagħġib kien parti minnhom. Baqaʼ fihom tul is-​snin. Għala? Għax żviluppaw is-​sens tagħhom taʼ stagħġib billi mmeditaw b’apprezzament fuq l-​għemejjel t’Alla. Is-​salmista talab: “Niftakar fiż-​żmien l-​imgħoddi, naħseb f’kull ma int għamilt, għemil idejk dejjem fi ħsiebi.”—Salm 143:5.

Kemm huma taʼ min ifaħħarhom l-​aduraturi t’Alla llum li għandhom dan is-​sens taʼ stagħġib! Int għandek? Qiegħed tiżviluppah?