Meta l-Wegħdi Jkunu Garanzija
FL-ISTORJA saru ħafna wegħdi li ma nżammux. Spiss ġnus sħaħ naqsu milli jżommu trattati taʼ paċi li jkunu ffirmaw solennement, u b’hekk daħħlu lin-nies tagħhom fi gwerer tal-biżaʼ. Napuljun darba qal: “Il-gvernijiet iżommu l-wegħdi tagħhom biss meta jkunu sforzati li jagħmlu dan, jew meta jkun jaqblilhom.”
Xi ngħidu għall-wegħdi li jagħmlu n-nies? Kemm hu taʼ diżappunt meta persuna ma żżommx kelmitha! Dan jiġri speċjalment meta l-persuna tkun tafha u tafdaha. M’għandniex xi ngħidu, in-nies għandhom mnejn ma jkunux jistgħu jew ma jkunux iridu jwettqu l-wegħdi li jkunu għamlu.
X’differenza hemm bejn il-wegħdi li jagħmel il-bniedem u l-wegħdi li jagħmel Alla! Il-wegħdi t’Alla tistaʼ tafdahom u toqgħod fuqhom. Kwalunkwe wegħda li jagħmel Alla Jehovah hija garanzija. Żgur se seħħ. Meta jirreferi għall-kelma t’Alla li ma tfalli qatt, Isaija 55:11 jgħid: “Hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”
Mela, allura, kif għandna nqisuhom il-wegħdi t’Alla li huma dokumentati fil-Bibbja? Ċertament li nistgħu noqogħdu fuqhom. Per eżempju, l-appostlu Ġwanni kiteb: “Din hi l-għamara taʼ Alla mal-bnedmin; u hu jgħammar magħhom, u huma jkunu l-poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-ħwejjeġ taʼ qabel.” (Apokalissi 21:3, 4) Int tistaʼ tgawdi barkiet bħal dawn jekk taġixxi fi qbil mal-kliem taʼ Ġesù: “Din hi l-ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.”—Ġwanni 17:3.