Għajnuna Vera għall-Foqra
META Ġesù Kristu, l-Iben t’Alla, kien hawn fuq l-art, hu b’interess ġenwin xtaq jgħin lill-foqra. Wieħed li ra l-ministeru taʼ Ġesù b’għajnejh stess qal: “L-għomja jaraw, iz-zopop jimxu, l-imġiddmin ifiqu, it-torox jisimgħu, il-mejtin iqumu, l-Evanġelju jixxandar lill-foqra.” (Mattew 11:5) Madankollu, xi ngħidu għall-miljuni taʼ nies foqra li hawn illum? Hemm xi aħbar tajba għalihom? Iva, hemm messaġġ taʼ tama!
Għalkemm ħafna drabi n-nies foqra jiġu injorati u minsijin mid-dinja in ġenerali, il-Kelma t’Alla, il-Bibbja, twiegħed: “Għax l-imsejken ma jintesiex għal dejjem; it-tama tal-fqajrin ma tkunx għal dejjem fiergħa.” (Salm 9:19 [9:18, NW]) Dan il-kliem mimli faraġ se jitwettaq meta s-Saltna t’Alla, gvern reali tas-sema, tieħu post kull ħakma umana. (Danjel 2:44) Bħala Sultan taʼ dak il-gvern tas-sema, Ġesù se “jħenn għad-dgħajjef u għall-fqajjar; il-ħajja tal-fqajrin isalva. Jeħlishom mill-qerq u mill-moħqrija; demmhom għażiż quddiem għajnejh.”—Salm 72:13, 14.
X’se jkunu l-kundizzjonijiet taʼ l-għajxien meta Ġesù jaħkem għal fuq l-art? Dawk li jgħixu taħt il-ħakma taʼ Kristu fuq l-art se jgawdu xogħol idejhom. Il-Bibbja f’Mikea 4:3, 4 tgħid: “Kull wieħed jinsab taħt id-dielja tiegħu, u taħt is-siġra tat-tin tiegħu; u ma jkunx hemm min iwerwirhom, għax fomm il-Mulej taʼ l-eżerċti tkellem.” Is-Saltna t’Alla saħansitra se ssolvi l-problemi tal-mard u l-mewt. (Isaija 25:8) X’dinja differenti se tkun dik! Dawn il-wegħdi li nsibu fil-Bibbja nistgħu nemmnuhom għax huma ispirati minn Alla nnifsu.
Barra li tagħti messaġġ taʼ tama, il-Bibbja tgħinna nkampaw maʼ l-isfidi taʼ kuljum, bħal li tegħleb in-nuqqas taʼ rispett lejk innifsek, li għandu mnejn jiġi meta wieħed ikun fqir. Kristjan fil-bżonn mill-istudju tiegħu tal-Bibbja jaf li f’għajnejn Alla hu prezzjuż daqs Kristjan li hu sinjur. Il-ktieb Bibliku taʼ Ġob jgħid li Alla ma ‘jistmax l-għani iktar mill-fqir, għax kollha huma xogħol idejh.’ (Ġob 34:19) Alla jħobbhom it-tnejn indaqs.—Atti 10:34, 35.