Hu Ħabb il-​Ħniena

MILTON G. HENSCHEL, membru li qeda għal ħafna żmien mal-​Ġemgħa li Tiggverna tax-​Xhieda taʼ Jehovah, temm il-​ħajja tiegħu fuq din l-​art nhar is-​Sibt, 22 taʼ Marzu, 2003. Kellu 82 sena.

Meta kien għadu żagħżugħ, Milton Henschel ngħaqad maʼ l-​istaff tal-​kwartieri ġenerali tax-​Xhieda taʼ Jehovah u qeda lealment għal iktar minn 60 sena. Malajr sar magħruf għal kemm kien bniedem għaqli u għall-​interess sinċier li wera fix-​xogħol taʼ l-​ippridkar tas-​Saltna. Fis-​sena 1939, hu sar is-​segretarju taʼ N. H. Knorr, li dak iż-​żmien kien l-​indokratur taʼ l-​istamperija tax-​Xhieda taʼ Jehovah ġewwa Brooklyn. Meta Ħuna Knorr beda jieħu t-​tmexxija fost ix-​Xhieda madwar id-​dinja fis-​sena 1942, hu żamm lil Ħuna Henschel bħala l-​assistent tiegħu. Ħuna Henschel iżżewweġ lil Lucille Bennett fl-​1956, u flimkien qasmu l-​ferħ u l-​isfidi tal-​ħajja.

Ħuna Henschel ħadem mill-​qrib maʼ Ħuna Knorr sakemm Knorr miet fl-​1977. Spiss, flimkien maʼ Ħuna Knorr, Ħuna Henschel ivvjaġġa lejn iktar minn 150 pajjiż, sabiex iżur u jinkuraġġixxi lix-​Xhieda taʼ Jehovah madwar id-​dinja, speċjalment lill-​missjunarji u lil dawk fl-​uffiċċji tal-​fergħat. Kultant, dawn il-​vjaġġi kienu diffiċli, anki saħansitra perikolużi. Meta fl-​1963 kien qed iżur konvenzjoni fil-​Liberja, Ħuna Henschel safa vittma taʼ persekuzzjoni vjolenti għax irrifjuta li jieħu sehem f’ċerimonja patrijottika.a Wara ftit xhur biss, Ħuna Henschel, mingħajr ma beżaʼ, irritorna l-​Liberja biex jiltaqaʼ mal-​president tal-​pajjiż u sabiex ifittex iktar libertà tal-​qima għax-​Xhieda taʼ Jehovah hemmhekk.

Meta kien jittratta xi problemi jew xi sfidi, Ħuna Henschel kellu reputazzjoni li kien prattiku, flessibbli, u raġunevoli. Dawk li ħadmu miegħu, b’mod partikulari kienu jistmaw l-​ordni, il-​modestja, u s-​sens t’umoriżmu tiegħu. Imbierek b’memorja mill-​aqwa, hu kien iferraħ lil ħafna missjunarji madwar id-​dinja meta mill-​ewwel kien jiftakar isimhom, jgħidilhom xi frażi jew tnejn bil-​lingwa lokali, u xi ċajta bil-​logħob tal-​kliem​—li kien iħobb jgħid bi tbissima fuq fommu.

Mikea 6:8 (Saydon) ifakkarna li Alla Jehovah iridna ‘nħobbu l-​ħniena.’ Milton Henschel se jibqaʼ jiġi miftakar talli ħalla eżempju f’dan ir-​rigward. Minkejja r-​responsabbiltà kollha li kellu, hu baqaʼ raġel li tħossok komdu miegħu, ġentili, u dħuli. Kien iħobb jgħid, “Meta jkollok dubju x’għandek tagħmel, ftakar li jekk turi ħniena tkun qed tagħmel l-​aħjar ħaġa.” Waqt li nitnikktu minħabba t-​telfa taʼ Ħuna tant maħbub, aħna ferħanin li hu baqaʼ leali sa l-​aħħar, u ċerti li se jieħu l-​premju tiegħu, “il-​kuruna tal-​ħajja.”—Apokalissi 2:10.

[Nota taʼ taħt]

[Stampa f’paġna 31]

M. G. Henschel maʼ N. H. Knorr

[Stampa f’paġna 31]

Maʼ martu, Lucille