“Tnejn min-​Nies Ħabbtulna l-​Bieb”

“GĦADDEW sentejn minn meta b’niket kbir ġarrabna t-​telfa tat-​tifla ż-​żgħira tagħna.” Dan hu kif bdiet ittra li ġiet pubblikata fil-​gazzetta Le Progrès, stampata f’Saint-Étienne, Franza.

“Mélissa kellha tliet xhur u sofriet mill-​kundizzjoni kerha trisomy 18. Qatt ma jirnexxilek tirkupra għalkollox minn traġedja bħal din li tant tidher inġusta. Għalkemm ġejna mrobbijin bħala Kattoliċi, konna ossessjonati bil-​ħsieb, ‘Alla, jekk verament teżisti, għala tippermetti li jiġru affarijiet bħal dawn?’” Jidher ċar li l-​omm li kitbet din l-​ittra ħassitha mnikkta u bla saħħa. L-​ittra tagħha tkompli:

“Ftit wara dan, tnejn min-​nies ħabbtulna l-​bieb. Mill-​ewwel indunajt li huma x-​Xhieda taʼ Jehovah. Kont lesta li bil-​pulit ngħidilhom biex imorru, imma mbagħad innotajt ċertu browxer li kienu qed joffru. Kien jitkellem dwar għala Alla jippermetti s-​sofferenza. Għalhekk, iddeċidejt li ndaħħalhom bl-​intenzjoni li nwaqqgħalhom l-​argumenti. Irraġunajt li fejn tidħol is-​sofferenza, il-​familja tagħna verament ma kinitx nieqsa minnha u li xbajna nisimgħu kummenti banali bħal ‘Alla tahielna, u Alla ħadhielna.’ Ix-​Xhieda qagħdu ftit iktar minn siegħa. Huma qagħdu jisimgħuni b’mogħdrija kbira, u tant ħassejtni aħjar sa x’ħin ġew biex jitilqu li ftehemna li se jerġgħu jżuruni. Dan kien sentejn ilu. Għadni ma sirtx waħda mix-​Xhieda taʼ Jehovah, imma bdejt nistudja l-​Bibbja magħhom, u nattendi l-​laqgħat tagħhom kulmeta jkun possibbli.”