Djarju Interessanti Ħafna

L-​ESPLORATUR Richard E. Byrd għamel ħames spedizzjonijiet lejn l-​Antartika mill-​1928 sa l-​1956. Peress li żamm djarju u ġurnal t’abbord dettaljat, hu u dawk li vvjaġġaw miegħu setgħu jiddeterminaw il-​movimenti tar-​riħ, ifasslu mapep, u jiksbu informazzjoni konsiderevoli dwar il-​kontinent taʼ l-​Antartika.

L-ispedizzjoni taʼ Byrd turi kemm jiswa li jinżamm ġurnal t’abbord. F’ġurnal, jew djarju, bħal dan jitniżżel rekord tad-​dettalji taʼ vjaġġ jew titjira. Din l-​informazzjoni tistaʼ tintuża iktar tard biex jirrivedu dak li jkun ġara jew biex janalizzaw informazzjoni li tistaʼ tkun t’għajnuna fil-​vjaġġi tal-​futur.

L-Iskrittura tipprovdi rakkont interessanti ħafna tad-​Dilluvju taʼ żmien Noè. Dan id-​Dilluvju globali dam sejjer għal iktar minn sena. Biex iħejju għad-​Dilluvju, Noè, il-​mara tiegħu, u t-​tliet subien tiegħu flimkien man-​nisa tagħhom damu madwar 50 jew 60 sena jibnu l-​arka—bastiment kbir li għandu volum taʼ madwar 40,000 metru kubu. X’kien l-​iskop tagħha? Li tippreserva xi bnedmin u annimali waqt id-​Dilluvju.—Ġenesi 7:​1-3.

Fil-fatt, il-​ktieb Bibliku taʼ Ġenesi fih dak li nistgħu nsejħulu d-​djarju taʼ Noè dwar dak li ġara mill-​bidu tad-​Dilluvju sakemm hu u l-​familja tiegħu ħarġu mill-​arka. Għandu dan xi importanza għalina llum?