Jum li Għandek Tiftakru

KIEN il-​jum li bidel kompletament il-​ħajja tal-​bnedmin għall-​benefiċċju dejjiemi tagħhom. Ebda jum ieħor fl-​istorja m’effettwa daqshekk il-​futur tal-​bnedmin. Kien il-​jum meta Ġesù wettaq dak kollu li ġie biex jagħmel fuq l-​art. Meta kien imsammar maʼ l-​għuda tat-​tortura, hu ħa l-​aħħar nifs tiegħu u għajjat: “Kollox hu mitmum!” (Ġwann 19:30) Għal liema skop ġie Ġesù?

Il-Bibbja tgħid: “Bin il-​bniedem, ma ġiex biex ikun moqdi, imma biex jaqdi u biex jagħti ħajtu b’fidwa għall-​kotra.” (Mattew 20:28) Ġesù ta ruħu, jew ħajtu, biex il-​bnedmin ikunu jistgħu jiġu salvati mid-​dnub li wirtu u mill-​mewt. Iva, “Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Ġwann 3:16) Kemm hu provvediment taʼ valur kbir is-​sagrifiċċju taʼ Ġesù!

Madankollu, hemm raġuni oħra għala jum il-​mewt taʼ Ġesù hu l-​iktar jum importanti. F’dak il-​jum, l-​Iben t’Alla għallem lill-​appostli tiegħu tagħlimiet importanti li kienu se jgħinuhom jibqgħu leali. Min jaf kemm messilhom qalbhom lid-​dixxipli l-​aħħar kliem tiegħu! X’għallimhom? Kif nistgħu nibbenefikaw minn dak li għallimhom Ġesù? Dawn il-​mistoqsijiet se jiġu diskussi fl-​artiklu li jmiss.