Sforzi li Jinkuraġġixxu Livelli Morali Tajbin

Lejn l-​aħħar tas-​sena 2001, dawk li kienu qed jisimgħu x-​xandira nazzjonali fuq Radju Możambik semgħu dan l-​avviż:

“Il-​president tar-​Repubblika żar il-​faċilitajiet tal-​fergħa tax-​Xhieda taʼ Jehovah f’Maputo. Hu ħeġġeġ lil din il-​kongregazzjoni reliġjuża biex iżżid l-​isforzi tagħha waqt li tinkuraġġixxi livelli morali tajbin fil-​familji u teduka lill-​adulti permezz taʼ programmi li fihom jitgħallmu l-​kitba u l-​qari. Madwar 10,000 persuna diġà bbenefikaw minn dawn il-​programmi. Skond il-​President Chissano, programmi bħal dawn huma taʼ min ifaħħarhom, minħabba li huma t’għajnuna imprezzabbli għall-​komunità biex isolvu l-​problemi fl-​edukazzjoni li dan il-​pajjiż għadu jiffaċċja.”

L-avviż kompla b’din is-​silta rekordjata mid-​diskors tal-​president: “Huwa veru inkuraġġanti għalina li naraw ħafna nies juru interess fil-​kitba u l-​qari. Dan jurina li wħud mis-​settur ċivili se jgħinuna nżidu n-​numru taʼ nies li jafu jiktbu u jaqraw. Għalhekk, nixtieq ninkuraġġixxi lix-​Xhieda taʼ Jehovah biex iżidu l-​programmi li fihom jgħallmu l-​kitba u l-​qari, bi kwalunkwe lingwa. Dak li hu verament importanti hu li n-​nies ikunu jafu jiktbu u jaqraw u li jsibuha iktar faċli biex jikkomunikaw u li fil-​futur ikunu jistgħu jipparteċipaw iżjed fl-​edukazzjoni.”

Ix-Xhieda taʼ Jehovah fil-​Możambik qed jikkonduċu klassijiet għall-​kitba u l-​qari fi 850 post mal-​pajjiż kollu sabiex jgħinu lin-​nies jitgħallmu jaqraw il-​Kelma t’Alla waħedhom. Barra minn hekk, qed jikkonduċu madwar 50,000 studju tal-​Bibbja fid-​djar bla ħlas kull ġimgħa. Dan kollu huwa parti minn programm Bibliku edukattiv li issa jinsab f’235 pajjiż. (Mattew 24:14) Int ukoll tistaʼ tibbenefika minn dan il-​programm. Jekk jogħġbok iżżommx lura milli tikkuntattja lix-​Xhieda taʼ Jehovah fil-​lokalità tiegħek.