Postijiet għall-​Qima—Għandna Bżonnhom?

‘Eluf taʼ pellegrini lebsin ilbies taʼ kull lewn minn inħawi differenti tal-​pajjiż, gruppi taʼ Indjani li mad-​daqq tat-​tanbur jimitaw iż-​żfin li jaħsbu li kien isir qabel l-​era Ispanika, u l-​fidili li b’uġigħ kbir jimxu għarkobbtejhom f’nofs il-​folol lejn is-​santwarju mlew il-​portiku u t-​toroq madwar il-​bażilika.’

IL-GAZZETTA El Economista hekk iddeskriviet lill-​ġemgħa kbira taʼ nies li nġabret f’Diċembru 2001. F’dak iż-​żmien, xi tliet miljun ruħ żaru l-​bażilika fil-​Belt tal-​Messiku biex juru l-​fidi tagħhom fil-​Verġni taʼ Gwadalupe. Postijiet reliġjużi kbar oħra, bħall-​Bażilika taʼ San Pietru f’Ruma, ukoll jiġbdu folol kbar taʼ viżitaturi.

Il-bini reliġjuż għandu post speċjali fil-​qlub taʼ ħafna li jixtiequ jqimu lil Alla. “Għalija l-​knisja kienet post fejn stajt inkun qrib t’Alla,” tgħid Maria mill-​Brażil. “Kien post qaddis. Kont nemmen li jekk immur il-​knisja r-​ruħ tindaf u kien dnub jekk ma mmurx għall-​Quddiesa u nqerr kull nhar taʼ Ħadd.” Consuelo mill-​Messiku tgħid: “Il-​knisja kienet tqanqal fija emozzjoni profonda; kont ngħożżha ferm. Meta kont inkun hemm, kont inħossni fis-​sema.”

Għalkemm xi wħud jagħtu importanza kbira lill-​knejjes, oħrajn għandhom id-​dubju dwar kemm hemm bżonnhom bħala postijiet għall-​qima. Peter Sibert, qassis Kattoliku fl-​Ingilterra, hu u jitkellem dwar l-​attendenza fqira fil-​knisja, qal: “[In-nies] jagħżlu l-​partijiet li jogħġbuhom mir-​reliġjon. Ħafna mill-​uħud anzjani huma Kattoliċi u jgħixu l-​fidi tagħhom—imma fost iż-​żgħażagħ m’hemmx dak is-​sens t’obbligu.” Id-​Daily Telegraph taʼ Londra taʼ l-​20 taʼ Novembru, 1998, osservat: “Mill-​1979 ’l hawn, fl-​Ingilterra ngħalqu xi 1,500 knisja meta tqabbilhom maʼ l-​495 knisja li nfetħu u l-​150 li nbnew mill-​ġdid.”

Fl-​1997, il-​gazzetta Süddeutsche Zeitung taʼ Munich, il-​Ġermanja, irrapportat: “Il-​knejjes mibdulin f’ċinema u appartamenti: Il-​kredenti mhux qed jattendu, il-​postijiet għall-​qima qed jintużaw għal affarijiet oħra. . . . Dak li diġà sar tradizzjoni fl-​Olanda jew fl-​Ingilterra issa qed isir fil-​Ġermanja.” Kompliet tgħid: “Ħaġa taʼ l-​għaġeb li f’dawn l-​aħħar ftit snin wieħed jistaʼ jsib xi 30 jew 40 knisja għall-​bejgħ fil-​Ġermanja.”

Hemm verament bżonn taʼ bini reliġjuż biex wieħed iqim ’l Alla? Inbnew il-​bażiliki u l-​knejjes kollha tiżjin fuq xi prattika stabbilita mill-​Iskrittura? Liema tip taʼ bini ġie assoċjat mal-​qima taʼ dak Alla veru u ħaj? X’nistgħu nitgħallmu minn dan il-​bini dwar il-​bżonn għal postijiet għall-​qima u dwar x’għandu jsir fihom?