Għandek Int Tieħu l-​Affarijiet bil-​Lajma?

ĦAFNA nies forsi jħossu li huwa kumpliment li ħaddieħor jarahom bħala persuna kalma, trankwilla, paċifika, u tolleranti. Madankollu, il-​kalma nistgħu nħarsu lejha minn angolu differenti. Il-​Bibbja tgħid: “Il-​lajma taʼ l-​istupidi hija dik li se teqridhom.” (Proverbji 1:​32, NW) Dan xi jfisser?

Verżjonijiet oħra tal-​Bibbja jittraduċu l-​kelma oriġinali Ebrajka b’espressjonijiet bħalma huma “nuqqas taʼ ħsieb” (Saydon) u “kuntent ħafna bih innifsu.” (The New American Bible) F’dan is-​sens, li tkun kalm hu assoċjat maʼ li tkun għażżien u traskurat, u b’hekk tkun stupidu u iblah.

Fl-ewwel seklu, il-​Kristjani fil-​kongregazzjoni taʼ Laodiċija kienu indifferenti jew kuntenti dwar in-​nuqqasijiet spiritwali tagħhom. Daqskemm kienu kuntenti bihom infushom ftaħru li ‘ma [kien] jonqoshom xejn.’ Ġesù Kristu kkoreġiehom billi ħeġġiġhom biex ikollhom l-​istess żelu Kristjan li kellhom qabel.—Apokalissi 3:​14-19.

Anki n-​nies taʼ żmien Noè kienu jieħdu l-​affarijiet bil-​lajma u kienu sodisfatti bihom infushom. Huma kien moħħhom biss fl-​affarijiet tad-​dinja, bħal li “jieklu u jixorbu, jiżżewwġu u jżewwġu . . . , u b’xejn ma ntebħu sa ma wasal id-​dilluvju u ġarr lil kulħadd.” Ġesù mbagħad żied: “Hekk tkun il-​miġja taʼ Bin il-​bniedem.”—Mattew 24:​37-39.

Il-profeziji tal-​Bibbja li twettqu jindikaw li qed ngħixu matul “il-​miġja taʼ Bin il-​bniedem,” Ġesù Kristu. Jalla qatt ma nsiru kuntenti bina nfusna, traskurati, jew nieħdu kollox bil-​lajma—kalmi fis-​sens negattiv.—Luqa 21:​29-36.