Lezzjoni miċ-​Ċikonja

“IMQAR il-​laqlâq [“iċ-​ċikonja,” NW] taʼ l-​ajru jagħraf żmienu . . . Imma l-​poplu tiegħi ma jagħrafx id-​dritt tal-​Mulej.” (Ġeremija 8:7) B’dan il-​kliem, il-​profeta Ġeremija lissen il-​ġudizzju taʼ Jehovah kontra l-​poplu apostat taʼ Ġuda li kien telaq lil Jehovah Alla tiegħu u dar lejn il-​qima taʼ divinitajiet barranin. (Ġeremija 7:​18, 31) Ġeremija għala għażel iċ-​ċikonja biex jagħti lezzjoni prattika lil-​Lhud infidili?

Għall-Iżraelin, iċ-​ċikonja, u speċjalment iċ-​ċikonja l-​bajda, kienet familjari għax kienet tpassi billi tgħaddi mill-​pajjiżi Bibliċi. L-​isem Ebrajk għal din it-​tajra taʼ l-​għadajjar, li hi kbira u għandha saqajha twal, huwa l-​forma femminili taʼ kelma li tfisser “wieħed leali; wieħed li għandu qalb tajba bl-​imħabba.” Dan huwa xieraq, għax kuntrarju għall-​biċċa l-​kbira mill-​għasafar l-​oħra, iċ-​ċikonji l-​bojod irġiel u nisa jibqgħu flimkien għal għomorhom. Wara li jgħaddu x-​xitwa f’reġjuni iktar sħan, il-​biċċa l-​kbira miċ-​ċikonji jirritornaw sena wara l-​oħra, spiss lejn l-​istess bejta li użaw qabel.

Fl-imġiba istintiva taċ-​ċikonja nistgħu naraw il-​kwalità tal-​lealtà b’modi oħra taʼ l-​għaġeb. Kemm l-​għasafar irġiel u kemm l-​għasafar nisa jieħdu sehem f’li jfaqqsu l-​bajd u jżoqqu l-​flieles. Il-​ktieb Our Magnificent Wildlife jispjega: “Bħala ġenituri, iċ-​ċikonji huma leali b’mod eċċezzjonali. Fil-​Ġermanja, ċikonja raġel laqat wajers tad-​dawl u miet bix-​xokk li ħa. Is-​sieħba tiegħu baqgħet tfaqqas il-​bajd waħedha għal 3 ijiem, li matulhom telqet mill-​bejta darba biss għal ftit ħin biex tfittex l-​ikel. . . . F’każ ieħor, meta ċikonja mara nqatlet b’tiri taʼ senter, il-​missier ħa ħsieb irabbi ż-​żgħar.”

Tabilħaqq, billi b’mod istintiv hi tkun leali lejn is-​sieħeb għal għomorha kollu u tieħu ħsieb iż-​żgħar tagħha, iċ-​ċikonja twettaq it-​tifsira taʼ isimha—“leali.” B’hekk, iċ-​ċikonji servew tajjeb bħala lezzjoni qawwija għall-​Iżraelin infidili u stinati.

Għal ħafna llum, il-​lealtà u l-​fedeltà huma ideat antikwati—taʼ min jammirahom imma mhux prattiċi. Iż-​żjieda kbira fid-​divorzju, fl-​abbandun, fl-​ingann, u fil-​forom oħra taʼ qerq turi li l-​lealtà m’għadhiex titqies li hi taʼ valur. B’kuntrast, il-​Bibbja tqis il-​lealtà, li hi mqanqla mill-​imħabba u l-​qalb tajba, bħala li hi taʼ valur kbir. Hi tħeġġeġ lill-​Kristjani biex ‘jilbsu l-​personalità l-​ġdida li kienet maħluqa skond ir-​rieda t’Alla fil-​ġustizzja u l-​lealtà vera.’ (Efesin 4:​24, NW) Iva, il-​personalità l-​ġdida tgħinna nkunu leali, imma wkoll miċ-​ċikonja nistgħu nieħdu lezzjoni dwar il-​lealtà.