Mistoqsijiet mill-​Qarrejja

Huwa meħtieġ tgħaddis komplet taħt l-​ilma jekk individwu jrid jitgħammed iżda għandu diżabilità serja jew saħħtu tkun batuta, u minħabba f’hekk it-​tgħaddis ikun diffiċli?

Il-​kelma “magħmudija” ġejja mill-​verb Grieg baʹpto, li jfisser “tbill.” Fil-​Bibbja, “li tgħammed” huwa l-​istess bħal “li tgħaddas.” Dwar il-​magħmudija li Filippu wettaq fuq l-​ewnuku Etjopjan, The Emphasised Bible, taʼ Rotherham tistqarr: “Niżlu t-​tnejn fl-​ilma, kemm Filippu u kemm l-​ewnuku—u hu għaddsu.” (Atti 8:38) Għalhekk, l-​individwu li qed jitgħammed irid fil-​fatt jiġi mgħaddas taħt l-​ilma.—Mattew 3:16; Mark 1:10.

Ġesù ordna lid-​dixxipli tiegħu: “Morru, mela, agħmlu dixxipli mill-​ġnus kollha, u għammduhom.” (Mattew 28:​19, 20) Fi qbil maʼ dan, ix-​Xhieda taʼ Jehovah jorganizzaw il-​magħmudija fil-​pixxini, fil-​baħar, fix-​xmajjar, jew f’postijiet oħra fejn hemm biżżejjed ilma biex wieħed ikun jistaʼ jiġi mgħaddas kompletament taħt l-​ilma. Peress li l-​magħmudija b’tgħaddis komplet taħt l-​ilma hija ħtieġa Skritturali, il-​bnedmin m’għandhom l-​ebda awtorità li jżommu lil xi ħadd mill-​magħmudija. Għalhekk, individwu għandu jitgħammed anki meta jkun meħtieġ li jsiru proċeduri mhux tas-​soltu minħabba l-​kundizzjoni tiegħu. Per eżempju, dawk kbar fl-​età jew b’saħħa batuta sabuha t’għajnuna kbira li jitgħammdu f’banjijiet kbar. L-​ilma fil-​banju jistaʼ jissaħħan, il-​kandidat għall-​magħmudija jistaʼ bil-​kalma u bil-​mod il-​mod jitqiegħed fl-​ilma, u meta jkun dara t-​temperatura, tkun tistaʼ ssir il-​magħmudija.

Anki nies b’diżabilità serja ġew mgħammdin. Saħansitra individwi li għamlu t-​trakeotomija, u bħala riżultat, għandhom toqba permanenti fi griżmejhom, jew uħud li jiddependu minn magna biex jieħdu n-​nifs ġew mgħaddsin. Ċertament, għal dan it-​tip taʼ magħmudija jkun hemm bżonn taʼ preparazzjoni bir-​reqqa. Huwa għaqli li jkun hemm infermier kwalifikat jassisti jew xi tabib jekk ikun disponibbli. Madankollu, meta tingħata attenzjoni speċjali jew jittieħdu l-​prekawzjonijiet neċessarji, il-​magħmudija tkun tistaʼ ssir—kważi dejjem. B’hekk, għandu jsir kull sforz raġunevoli sabiex dak li jkun jitgħammed fl-​ilma jekk din hija x-​xewqa sinċiera taʼ l-​individwu u jekk hu lest li jaċċetta r-​riskji involuti.