Proklamaturi tas-​Saltna Jirrapportaw

HIJA r-​rieda t’Alla li “l-​bnedmin kollha jsalvaw u jaslu biex jagħrfu l-​verità.” (1 Timotju 2:​3, 4) Biex tintlaħaq din il-​mira, ix-​Xhieda taʼ Jehovah stampaw u qassmu miljuni taʼ kopji tal-​Bibbja u kotba t’għajnuna għall-​istudju tal-​Bibbja. Xi drabi, dawn il-​pubblikazzjonijiet għenu lil uħud taʼ qalb onesta biex jitgħallmu l-​verità b’modi li verament ma tistenniehomx. Dwar dan, il-​proklamaturi tas-​Saltna ġewwa Freetown, fi Sierra Leone, jirrapportaw l-​esperjenza li ġejja.

Osman kien it-​tieni iben taʼ familja b’disat itfal. Peress li trabba ġewwa familja reliġjuża, kien imur regolarment jagħti qima maʼ missieru. Madankollu, Osman, kien inkwetat ferm b’dak li r-​reliġjon tiegħu għallmitu dwar l-​infern. Ma setax jifhem kif Alla ħanin jistaʼ jaħqar lill-​ħżiena billi jaħraqhom fin-​nar. L-​ispjegazzjonijiet kollha li ngħataw lil Osman biex jgħinuh jifhem id-​duttrina tan-​nar taʼ l-​infern ma rnexxilhomx iserrħulu rasu.

Darba minnhom, meta Osman kellu 20 sena, innota ktieb blu nofsu mgħotti bl-​iskart f’barmil taż-​żibel. Peress li kien iħobb jaqra, ġabru, naddfu, u nnota t-​titlu—Il-​Verità li Twassal għal Ħajja Eterna.a

‘X’verità hi din?’ ħaseb Osman. Il-​kurżità għelbitu, u Osman ħa l-​ktieb id-​dar u qrah kollu f’daqqa. Kemm feraħ meta tgħallem li Alla kellu isem persunali—Jehovah! (Salm 83:19 [83:​18, NW]) Osman tgħallem ukoll li l-​kwalità superjuri t’Alla hija l-​imħabba u li Hu jistmerr saħansitra l-​ħsieb li jaħqar lin-​nies f’post bin-​nar. (Ġeremija 32:35; 1 Ġwann 4:8) Fl-​aħħar, Osman qara li Jehovah dalwaqt se jġib ġenna taʼ l-​art fejn in-​nies se jkunu jistgħu jgħixu għal dejjem. (Salm 37:29; Apokalissi 21:​3, 4) X’verità meraviljuża mingħand Alla ħanin u kollu mħabba! B’qalbu mimlija gratitudni, Osman irringrazzja lil Jehovah talli ppermettielu jsib il-​verità f’post tant mhux tas-​soltu.

Ftit jiem wara, bl-​għajnuna taʼ xi ħbieb, Osman sab is-​Sala tas-​Saltna tax-​Xhieda taʼ Jehovah u attenda llaqgħa għall-​ewwel darba. Waqt li kien hemm, staqsa lil Xhud biex jistudja l-​Bibbja miegħu. Minkejja l-​oppożizzjoni kbira mingħand tal-​familja, Osman kompla jagħmel progress spiritwali u tgħammed. (Mattew 10:36) Illum, hu jaqdi bħala anzjan fil-​kongregazzjoni. Kemm hi xi ħaġa mill-​isbaħ li dan kollu rriżulta minn sejba taʼ pubblikazzjoni tal-​Bibbja f’barmil taż-​żibel!

[Nota taʼ taħt]