Meta Jkun Għaqli li Taħrab

ILLUM, id-​dinja hija karatterizzata minn tentazzjonijiet kbar. Hija wkoll maħkuma minn spirtu taʼ ostilità u kuraġġ, li kultant ikun superfiċjali. Xi ħadd li jaħrab minn ċerta sitwazzjoni, ġeneralment jidher li hu dgħajjef jew beżżiegħ. Jistaʼ saħansitra jiġi mwaqqaʼ għaċ-​ċajt.

Madankollu, il-​Bibbja tagħmilha ċara li kultant biex tkun għaqli u kuraġġuż trid taħrab. B’dan f’moħħu, ara x’qalilhom Ġesù lid-​dixxipli tiegħu qabel ma bagħathom ixandru: “Jekk jippersegwitawkom f’belt, aħarbu f’oħra.” (Mattew 10:23) Iva, id-​dixxipli taʼ Ġesù kellhom jipprovaw jaħarbu minn dawk li jippersegwitawhom. Ma kellhomx jagħmlu xi kruċjata, u jipprovaw jikkonvertu lin-​nies billi jużaw il-​forza. Il-​messaġġ tagħhom kien wieħed taʼ paċi. (Mattew 10:​11-14; Atti 10:​34-37) Għalhekk, minflok ma jitilfu l-​kontroll, il-​Kristjani kellhom jaħarbu, jitbiegħdu minn dak li jkun qed iġagħalhom jitilfu l-​kalma. B’dan il-​mod, huma jkunu żammew kuxjenza nadifa kif ukoll ir-​relazzjoni prezzjuża tagħhom maʼ Jehovah.—2 Korintin 4:​1, 2, Saydon.

Fil-​ktieb tal-​Proverbji nsibu eżempju li juri kuntrast. Dan isemmi żagħżugħ li, minflok ma ħarab meta kien qed jiġi ttantat, baqaʼ sejjer wara prostituta “bħal gendus sejjer għall-​qatla.” Ir-​riżultat? Gwaj kbir għaliex kien ċeda għat-​tentazzjoni li poġġietlu ħajtu fil-​periklu.—Proverbji 7:​5-8, 21-23.

Xi ngħidu jekk tiġi ttantat biex tikkommetti l-​immoralità sesswali jew tħabbat wiċċek maʼ xi periklu ieħor li jistaʼ jitfaċċa? Skond il-​Kelma t’Alla, x’aktarx li l-​aħjar li tagħmel hu li titbiegħed minn dak il-​post fil-​pront.—Proverbji 4:​14, 15; 1 Korintin 6:18; 2 Timotju 2:22.