Għaqlin bil-​Mod Tagħhom

“L-​ADULTI għandhom għaqal, imma t-​tfal huma għaqlin bil-​mod tagħhom,” jgħid proverbju Niġerjan. Edwin, anzjan Kristjan fin-​Niġerja, sab kemm dan huwa minnu.

Jum wieħed, Edwin sab kaxxa tal-​metall taħt l-​iskrivanija tiegħu d-​dar.

“Taʼ min hi?” staqsa Edwin lit-​tlett itfal tiegħu.

“Tiegħi,” wieġbu Emmanuel li għandu tmien snin. Malajr malajr żied jgħidlu li din il-​kaxxa tal-​ħadid imsadda, li kienet kbira daqs ħames pulzieri kwadri b’xaqq fil-​wiċċ, kienet għall-​kontribuzzjonijiet tax-​xogħol madwar id-​dinja tax-​Xhieda taʼ Jehovah. “Peress li ma mmurx fis-​Sala tas-​Saltna kuljum,” spjega hu, “iddeċidejt li nagħmel kaxxa biex fiha nitfaʼ xi flus li s-​soltu nonfoq għall-​ikel.”

Missier Emmanuel kellu kaxxa d-​dar biex iġemmaʼ l-​flus ħalli jattendu l-​konvenzjoni distrettwali taʼ kull sena. Imma minħabba emerġenza li nqalgħet fil-​familja, kellhom jużaw il-​flus li kien hemm fiha. Biex ikun ċert li l-​flus tal-​kontribuzzjoni tiegħu ma jintużawx għal xi skop ieħor, Emmanuel ħa bott qadim għand welder biex jissiġillahulu. Il-​welder, x’ħin sar jaf l-​iskop għal dan il-​bott, għamel kaxxa għal Emmanuel mill-​biċċiet tal-​metall li kellu. Michael, li għandu ħames snin u li hu ħu Emmanuel, ukoll staqsa għal kaxxa.

Imbellah b’dak li kienu għamlu t-​tfal, Edwin staqsiehom għala kienu qalu lill-​welder biex jagħmlilhom il-​kaxxi. Michael wieġeb: “Jien irrid nitfaʼ xi ħaġa wkoll!”

Mingħajr ma kienu jafu l-​ġenituri tagħhom, Emmanuel, Michael, u oħthom taʼ disaʼ snin Uchei, kienu qed iġemmgħu parti mill-​flus li jagħtuhom il-​ġenituri biex jixtru l-​ikel u li ma kinux nefqu, u bdew ipoġġuhom fil-​kaxxi. Minfejn ġabuha l-​idea? Meta t-​tfal tgħallmu jżommu l-​affarijiet f’idejhom, il-​ġenituri għallmuhom kif jitfgħu xi ħaġa tal-​flus fil-​kaxxa tal-​kontribuzzjonijiet fis-​Sala tas-​Saltna. Ovvjament, it-​tfal tgħallmuha sew il-​lezzjoni.

Meta mtlew il-​kaxxi, qasmuhom biex jiftħuhom. B’kollox ġemmgħu Lm1.42—li m’hijiex somma żgħira f’pajjiż fejn il-​medja taʼ dħul kull sena hija biss taʼ ftit iktar minn mitt lira. Donazzjonijiet volontarji bħal dawn jappoġġaw ix-​xogħol taʼ l-​ippridkar tax-​Xhieda taʼ Jehovah li bħalissa qed isir f’235 pajjiż madwar id-​dinja.