“Narak fis-​Saltna t’Alla”

“Għażiż Ħabib! Rupert, illum inqatgħatli għall-​mewt. Toqgħodx titnikket minħabba fija. Nibgħat l-​imħabba tiegħi lilek u lil kulħadd id-​dar. Narak fis-​Saltna t’Alla.”

FIT-​8 TAʼ ĠUNJU, 1942, Franc Drozg kiteb dan il-​kliem ftit minuti qabel ma sparawlu s-​suldati Nazisti. Għala ngħata l-​mewt?

Skond id-​dokumenti fil-​Mużew tal-​Liberazzjoni Nazzjonali f’Maribor, fis-​Slovenja, dan il-​ħaddied taʼ 38 sena rrifjuta li jingħaqad mal-​Wehrmannschaft. Dan kien grupp paramilitari Ġermaniż fis-​Slovenja li dak iż-​żmien kienet maħkuma mill-​Ġermanja. Hu kien Bibelforscher, jew Student tal-​Bibbja, bħalma kienu magħrufa x-​Xhieda taʼ Jehovah f’dawk l-​inħawi. Minħabba li ried jaġixxi fi qbil maʼ Isaija 2:​4, hu ma riedx jappoġġa l-​isforzi tan-​Nazi għall-​gwerra, u ddikjara li kien sudditu tas-​Saltna t’Alla.—Mattew 6:33.

Fi Ptuj, il-​belt fejn kien joqgħod, Franc kien magħruf bħala proklamatur żeluż taʼ l-​aħbar tajba tas-​Saltna t’Alla. (Mattew 24:14) Minkejja ħafna diffikultajiet, hu ppriedka l-​aħbar tajba bla heda sakemm ġie arrestat f’Mejju taʼ l-​1942.

Ħafna Xhieda taʼ Jehovah fis-​Slovenja kienu persegwitati bl-​aħrax min-​Nazi. Franc kien wieħed minn taʼ l-​ewwel li ngħata l-​mewt minħabba t-​twemmin reliġjuż tiegħu. Bħall-​Kristjani taʼ l-​ewwel seklu, hu ġie msaħħaħ bil-​kliem: “Jeħtiġilna nbatu ħafna biex nidħlu fis-​Saltna taʼ Alla.” (Atti 14:22) L-​aħħar kliem li qal “narak fis-​Saltna t’Alla” juri kemm kien reali għalih il-​gvern tas-​sema.

[Sors tal-​Istampa f’paġna 32]

Franc Drozg: Ritratt tal-​Mużew taʼ l-​Arkivji tal-​Liberazzjoni Nazzjonali f’Maribor, fis-​Slovenja; ittra: L-​oriġinali miżmuma fil-​Mużew tal-​Liberazzjoni Nazzjonali f’Maribor, fis-​Slovenja