Kun Grat u Kun Ferħan

‘L-​ISTINT tal-​gratitudni hu esperjenza essenzjali għall-​bnedmin,’ qal il-​Calgary Herald, ġurnal Kanadiż. Il-​Herald ikkwota lil xi studenti taʼ disaʼ snin mill-​iskola primarja li l-​għalliem tagħhom staqsiehom biex jiktbu dwar l-​affarijiet kollha li għalihom kienu grati. Wieħed tifel qal li hu kien grat lejn il-​familja tiegħu ‘għax huma ħadu ħsiebu.’ Waħda tifla żgħira wkoll kienet grata lejn il-​familja tagħha u qalet: “Huma jipprovduli sigurtà, iżommuni f’saħħti, jieħdu ħsiebi, iħobbuni, jitimgħuni, u li ma kienx għall-​ġenituri tiegħi, kieku m’iniex qiegħda hawn fuq din l-​art.”

L-ingratitudni twassal għal nuqqas taʼ sodisfazzjon permanenti. Skond il-​filosfu-teologu J. I. Packer, “aħna magħmulin biex ngħixu b’tali mod li niddependu minn Alla u minn xulxin.” Dan ifakkarna fil-​parir għaqli tal-​Bibbja li sar mijiet taʼ snin ilu, li jgħid: “Roddu ħajr.” (Kolossin 3:​15) Li nesprimu radd il-​ħajr u gratitudni mill-​qalb lejn l-​oħrajn jgħinna nikkultivaw ħbiberiji fejn kulħadd jieħu ħsieb xulxin.

Barra minn hekk, meta napprezzaw u nistmaw lil xulxin, inkunu qed nuru gratitudni lejn Jehovah, u hu jinnotah dan. Il-​Bibbja tgħid: “[Għajnejn Jehovah] jiġru fuq l-​art kollha, isaħħaħ lil dawk li qalbhom marbuta fis-​sħiħ miegħu.” (2 Kronaki 16:9) Alla jiżgurana li hu jiftakar u jgħożż l-​imħabba li l-​bnedmin juru għal ismu. (Lhud 6:10) Iva, aħna għandna raġuni tajba għalxiex nuru li aħna grati, għax din il-​kwalità li ġejja minn Alla, meta nuruha kuljum togħġob lil Jehovah u ġġibilna l-​ferħ. Hi bħalma jgħid Proverbji 15:13: “Il-​qalb ferħana tagħmel il-​wiċċ daħkan.”