Ir-​Reliġjon Se Ġġib il-​Paċi Dinjija?

BEJN it-​28 u l-​31 t’Awissu, 2000, fil-​Belt taʼ New York iltaqgħu iktar minn 500 rappreżentant reliġjuż minn 73 pajjiż differenti. Dawn il-​mexxejja reliġjużi u spiritwali ltaqgħu għas-​summit tal-​millennju dwar il-​paċi dinjija li sar fil-​kwartieri ġenerali tal-​Ġnus Magħquda. Il-​mexxejja, libsin turbantijiet, ilbiesi twal lewn iż-​żagħfran, kpiepel tar-​rix, jew imnatar twal suwed, kienu jirrappreżentaw numru kbir taʼ reliġjonijiet differenti. Fosthom kien hemm membri tal-​Baħaiżmu, Buddiżmu, Ġajniżmu, Ġudaiżmu, Ħinduiżmu, Islam, Sikhiżmu, Taoiżmu, Xintù, Żoroastrijaniżmu, u reliġjonijiet tal-​Kristjaneżmu.

Għall-ewwel jumejn mill-​erbat ijiem tal-​konferenza, id-​delegati ltaqgħu fil-​kwartieri ġenerali tal-​Ġnus Magħquda. Madankollu, ma kinitx il-​Ġnus Magħquda li organizzat din il-​konferenza u lanqas ma kienet hi li ħarġet il-​flus għaliha, iżda xi fondazzjonijiet oħrajn. Minkejja dan, kemm il-​ĠM u kemm il-​mexxejja reliġjużi tkellmu dwar l-​importanza taʼ li jaħdmu flimkien biex itemmu l-​faqar, ir-​razziżmu, il-​problemi ambjentali, u l-​armi li jeqirdu bil-​massa.

Id-delegati ffirmaw dokument bit-​titlu “Impenn Lejn Paċi Globali.” Filwaqt li rrikonoxxa li l-​vjolenza u l-​gwerer “kultant isiru f’isem ir-​reliġjon,” id-​dokument stqarr li dawk li jiffirmawh kienu se “jaħdmu id f’id mal-​Ġnus Magħquda . . . f’li jipprovaw jiksbu l-​paċi.” Madankollu, ma kien hemm l-​ebda riżoluzzjoni speċifika li tagħti ħjiel kif dan jistaʼ jsir.

Fit-tieni jum, Bawa Jain, is-​segretarju ġenerali tas-​summit, għalaq id-​diskors tal-​ftuħ tiegħu billi spjega li xi ftit tas-​snin qabel, hu kien ra pittura partikulari fil-​kwartieri ġenerali tal-​Ġnus Magħquda. Il-​pittura tat stampa taʼ raġel itwal mill-​bini tas-​Segretarjat tal-​Ġnus Magħquda, li kien qed iħabbat fuq il-​bini qisu kien xi bieb. Taħt il-​pittura kien hemm il-​kliem: “Prinċep tal-​Paċi.” Is-​Sur Jain qal: “Malli rajt [il-pittura], din ħalliet effett qawwi fuqi. Staqsejt lil ħafna nies x’kienet tfisser. Illum naħseb li ħadtha t-​tweġiba. Il-​fatt li intom, il-​mexxejja reliġjużi u spiritwali tad-​dinja kollha, inġbartu hawn ilkoll flimkien jurini li [intom] il-​prinċep tal-​paċi li qed iħabbat fuq il-​bieb tal-​Ġnus Magħquda.”

Il-Bibbja tagħti ħarsa differenti. Hi turi li l-​Prinċep tal-​Paċi huwa Ġesù Kristu. Hu se jġib il-​paċi dinjija, mhux permezz taʼ l-​isforzi tal-​mexxejja politiċi jew reliġjużi taʼ din id-​dinja, iżda permezz tas-​Saltna t’Alla. Hija din is-​Saltna, il-​gvern tas-​sema t’Alla, li se jirnexxilha tgħaqqad lill-​bnedmin ubbidjenti u ġġiegħel li r-​rieda t’Alla ssir fuq l-​art.​—Isaija 9:5 [9:​6, NW]; Mattew 6:​9, 10.