Lezzjoni mill-​Baħri

META baħri jbaħħar waħdu bejn sema u ilma jistaʼ jispiċċa bla saħħa. L-​għeja tant jistaʼ jkollha effett perikoluż fuq il-​baħri mifluġ, li tistaʼ twasslu biex jagħmel xi żbalji jew deċiżjonijiet ħżiena. Għal din ir-​raġuni, hu japprezza l-​valur taʼ l-​ankra. Din isservi biex meta l-​baħri jkun irid jistrieħ u jiġi f’tiegħu, ikun jistaʼ jagħmel dan mingħajr il-​biżaʼ li jittieħed mal-​kurrent. Fl-​istess ħin, l-​ankra ġġiegħel il-​pruwa tipponta lejn ir-​riħ u l-​mewġ, u żżomm id-​dgħajsa fl-​iktar pożizzjoni stabbli.

Sewwa sew bħalma l-​baħrin jiffaċċjaw diversi perikli fil-​baħar, il-​Kristjani jiffaċċjaw kontinwament il-​pressjonijiet taʼ din id-​dinja u jħossu l-​bżonn li jistrieħu. Fil-​fatt, darba waħda Ġesù rrikkmanda lid-​dixxipli tiegħu: “Ejjew miegħi intom biss weħidkom f’xi post imwarrab, u strieħu ftit.” (Mark 6:31) Illum, xi wħud jistgħu jieħdu xi ftit ġimgħat biex isiefru, jew inkella jqattgħu tmiem il-​ġimgħa xi mkien biex jistrieħu mal-​familja tagħhom. Dawn il-​mumenti jistgħu jagħtuk il-​ħajja u jsaħħuk mill-​ġdid. Kif, iżda, nistgħu nkunu ċerti li f’dawn il-​mumenti m’aħna qegħdin niffaċċjaw l-​ebda periklu spiritwalment? X’tistaʼ tkun l-​ankra spiritwali tagħna li tgħinna nżommu sod u ma nħallux il-​kurrent jiħodna miegħu?

Mill-ġenerożità tiegħu, Jehovah pprovdielna xi ħaġa. M’hi xejn ħlief il-​Kelma Mqaddsa tiegħu, il-​Bibbja. Billi naqrawha kuljum, nistgħu nibqgħu qrib taʼ Jehovah u ma nitbegħdu qatt minnu. Il-​pariri tagħha jistgħu jgħinuna nibqgħu sodi, u b’hekk nieqfu kontra t-​tentazzjonijiet taʼ Satana u tad-​dinja tiegħu. Billi jkollna programm regulari taʼ qari tal-​Bibbja, saħansitra meta ma nkunux qed inżommu maʼ l-​iskeda tagħna, jistaʼ jservi biex iżommna ankrati spiritwalment.—Ġożwè 1:7, 8; Kolossin 2:7.

Is-salmista jfakkarna li “hieni l-​bniedem” li “fil-​liġi tal-​Mulej hi l-​għaxqa tiegħu, lejl u nhar jaħseb fil-​liġi tiegħu.” (Salm 1:1, 2) Li naqraw il-​Kelma t’Alla kuljum se jġibilna r-​riżultat “hieni” taʼ li nħossuna verament rifreskati u msaħħin mill-​ġdid, lesti biex inkomplu fil-​korsa Kristjana tagħna.