Min Se Jtemm il-​Vjolenza?

F’SETTEMBRU taʼ l-​1999, is-​Segretarju Ġenerali tal-​ĠM, Kofi Annan, iltaqaʼ mad-​delegati għall-​54 sessjoni annwali taʼ l-​Assemblea Ġenerali. Kif ġie rapportat f’The Toronto Star, hu qajjem kwistjoni għall-​mexxejja dinjin, billi stqarr: “Hemm numru kbir taʼ nies li għandhom bżonn taʼ iktar minn sempliċi kliem taʼ simpatija mill-​komunità internazzjonali. Dawn jeħtieġu ’l min jimpennja ruħu tassew u jagħtihom l-​appoġġ neċessarju f’li jgħinhom iġibu fi tmiem iċ-​ċikli taʼ vjolenza, u jqabbadhom it-​triq għall-​prosperità ’l bogħod mill-​periklu.”

Jistgħu l-​ĠM u l-​ġnus membri tagħha jagħmluh tassew dan l-​impenn u jagħtu l-​appoġġ neċessarju biex tintemm il-​vjolenza? Bħalma ġie kwotat fl-​istess rapport taʼ Star, il-​President taʼ l-​Istati Uniti, Bill Clinton, qal: “Wara t-​tixrid kollu taʼ demm li sar f’dan is-​seklu, aħna nafu li faċli ngħidu ‘mhux se jerġaʼ jiġri,’ imma hu ferm iktar diffiċli li nwettquh.” Hu żied: “Meta nwegħdu żżejjed jistaʼ jkun krudili daqs meta ftit li xejn nagħtu kas.”

Iktar minn 2,500 sena ilu, il-​profeta Ġeremija qal dan rigward l-​isforzi umani: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Mela, x’tama għandna li l-​vjolenza se tintemm?

Bħalma naqraw f’Isaija 60:​18, Alla ta l-​assiguranza: “Ma tinstemax aktar dnewwa f’artek, u ħerba u qerda fi trufijietek.” Din il-​profezija diġà kellha l-​ewwel twettiq tagħha meta Alla ġab lin-​nies tiegħu lura mill-​eżilju lejn art twelidhom. Iżda għandha wkoll twettiq akbar li aħna nistgħu ngawdu minnu. Alla Jehovah mhux qed ‘iwiegħed iżżejjed.’ Bħala l-​Iktar Għoli u l-​Ħallieq taʼ l-​umanità, hu jinsab fl-​aħjar pożizzjoni li jġib fi tmiem ‘iċ-​ċikli taʼ vjolenza.’ Taħt is-​Saltna t’Alla, il-​paċi se tirbaħ. Il-​vjolenza se tispiċċa għal dejjem!—Danjel 2:44.