Sena Eċċellenti fit-​Tqassim tal-​Bibbja

ĦAFNA iktar nies minn qatt qabel għandhom Bibbja. Hekk jissuġġerixxi rapport mill-​United Bible Societies, għaliex fl-​1998 in-​numru taʼ Bibbji li tqassmu żdied b’iktar minn nofs miljun fuq is-​sena taʼ qabel. B’kollox, ’il fuq minn 585,000,000 Bibbja—sħiħa jew partijiet minnha—tqassmu mal-​globu kollu. “Dan għandu għalfejn jinkuraġġina,” jgħid ir-​rapport. “Illum ħafna iktar nies qegħdin jintlaħqu bil-​Kelma t’Alla.”

M’għandniex xi ngħidu, hemm differenza bejn li jkollok Bibbja u li taqraha. Per eżempju, stħarriġ wieħed irrivela li iktar minn 90 fil-​mija taʼ l-​Amerikani għandhom minn taʼ l-​inqas Bibbja waħda, u daqstant oħra jemmnu li l-​Bibbja hija sors tajjeb taʼ tagħlim morali. Madankollu, 59 fil-​mija biss qalu li jduru lejn il-​Bibbja għall-​pariri. U 29 fil-​mija ammettew li jew “ma tantx huma familjari” inkella li “m’huma familjari xejn” mal-​Bibbja.

Ix-Xhieda taʼ Jehovah mhux biss jistampaw u jqassmu Bibbji imma jikkonduċu wkoll studji tal-​Bibbja fid-​djar maʼ nies f’iktar minn 230 pajjiż. U dan jagħmluh bla ħlas. Issa, hemm miljuni mad-​dinja kollha li qegħdin jibbenefikaw minn dan il-​programm edukattiv tal-​Bibbja. Huma jiġu megħjuna biex ikampaw mal-​problemi li qegħdin iħabbtu wiċċhom magħhom issa, u jitgħallmu x’tgħid il-​Bibbja dwar futur mill-​isbaħ taħt is-​Saltna t’Alla.—Isaija 48:​17, 18; Mattew 6:​9, 10.

[Stampi f’paġna 32]

Studji tal-​Bibbja fid-​djar (skond l-​arloġġ mix-​xellug fuq) fil-​Bolivja, fil-​Gana, fis-​Sri Lanka, u fl-​Ingilterra