Int Tistaʼ Tkun Taf il-Futur!
Il-biċċa l-kbira tan-nies jaħsbu serjament dwar il-futur. Huma jħobbu jippjanaw, jinvestu bil-għaqal, u jħossuhom fiż-żgur. Imma hemm xi mod kif tistaʼ tkun ċert dwar x’se jiġri għada?
BIEX jipprovaw jitkixxfu dwar x’se jiġri fil-futur, il-bnedmin esperimentaw b’kull xorta t’affarijiet. Xjenzati soċjali msejħin futurologi janalizzaw tendenzi kurrenti u jużawhom bħala bażi għat-tbassir tagħhom. L-ekonomisti jagħmlu l-istess fil-qasam tagħhom. L-astrologi u l-bassara jirrikorru għall-oroskopji, l-isferi tal-kristall, u l-okkult, u għandhom ħafna segwaċi. Per eżempju, l-astrologu Franċiż Nostradamus baqaʼ popolari sal-lum, għalkemm ilu mejjet sekli sħaħ.
Il-fatti juru li dawn kollha li jgħidu li huma profeti assolutament ma tistax toqgħod fuqhom u jiddiżappuntawk. Għala? Għaliex huma jinjoraw lil Alla Jehovah u l-Kelma tiegħu, il-Bibbja. Għal din ir-raġuni, huma m’humiex kapaċi jwieġbu mistoqsijiet bażiċi bħal dawn: ‘Għala nistaʼ nkun ċert li l-affarijiet imbassrin fil-Bibbja se jseħħu? Dawn kif jaqblu maʼ l-iskop t’Alla għall-bnedmin? Jien u l-familja tiegħi kif nistgħu nibbenefikaw minn dawn il-profeziji?’ Il-Bibbja għandha t-tweġiba għal dawn il-mistoqsijiet.
Il-profeziji tal-Bibbja huma superjuri wkoll f’ħafna modi oħrajn. Kuntrarju għat-taħbir astroloġiku, dawn jagħtu lil dak li jkun ir-rieda ħielsa. Għaldaqstant, ħadd m’hu vittma tad-destin. (Dewteronomju 30:19) Kitbiet bħal dawk taʼ Nostradamus huma fiergħa moralment, u jgħattu din il-frugħa bil-misteri u billi jippreżentaw l-affarijiet b’mod li jqanqal sensazzjoni. Imma l-profeziji tal-Bibbja għandhom bażi morali soda. Dawn jispjegaw għala Alla se jwettaq l-iskop tiegħu. (2 Kronaki 36:15) U l-profeziji taʼ Jehovah qatt ma jfallu, għax “Alla . . . ma jistax jigdeb.” (Titus 1:2, Karm Żammit) B’hekk, dawk l-individwi li huma gwidati mill-Kelma t’Alla jgħixu ħajjiet imdawlin, taʼ skop, u ferħanin mingħajr ma joqogħdu jaħlu l-ħin prezzjuż u r-riżorsi siewja tagħhom fil-ġiri wara interessi fiergħa.—Salm 25:12, 13.
Dawn u ħafna punti oħrajn ġew diskussi fil-Konvenzjonijiet Distrettwali 1999/2000 tax-Xhieda taʼ Jehovah bit-tema “Il-Kelma Profetika t’Alla” li nżammu madwar id-dinja kollha. Taħditiet, intervisti, turijiet, u drama Biblika ġibdu l-attenzjoni taʼ l-udjenza lejn il-wirt spiritwali meraviljuż li jgawdu dawk li jistudjaw u japplikaw il-kelma profetika t’Alla. L-artiklu li jmiss se jirrevedi xi ftit punti prinċipali eċċitanti tal-konvenzjoni.