Kif Tilqaʼ l-​Isfidi taʼ li Tkun Ġenitur

IT-​TROBBIJA tat-​tfal illum, speċjalment taʼ l-​adolexxenti, hija sfida li tbeżżagħhom lill-​ġenituri. The Gazette taʼ Montreal, il-​Kanada, tirrapporta li l-​esperimentar bl-​alkoħol u bid-​drogi sar “xi ħaġa taʼ kuljum għall-​adolexxenti.” Din tenfasizza li l-​ġenituri għandhom “ir-​responsabbiltà li joqogħdu b’għajnejhom miftuħin għal bidliet fl-​imġiba taʼ l-​adolexxenti [tagħhom].”

X’inhuma xi affarijiet li l-​ġenituri għandhom joqogħdu attenti għalihom li jistgħu jindikawlhom jekk jeżistux dawn il-​problemi taʼ l-​adolexxenti? Xi sinjali taʼ twissija kemm fiżiċi, emozzjonali, u soċjali ġew identifikati mill-​Akkademja Amerikana tal-​Psikjatrija tat-​Tfal u taʼ l-​Adolexxenti. Dawn jinkludu għeja fit-​tul, tibdil fil-​personalità u fin-​natural tagħhom, imġiba ġellieda, ukoll iqattgħu wisq ħin imsakkrin fil-​kamra tas-​sodda, u jaħbtu dufrejhom mal-​liġi.

Kif jistgħu l-​ġenituri jipproteġu lil uliedhom minn dan l-​esperimentar taʼ ħsara u mill-​konsegwenzi negattivi li jirriżultaw minnu? Dr. Jeffrey L. Derevensky, mill-​Università McGill, jemmen li l-​komunikazzjoni aperta u l-​ikkultivar taʼ rispett reċiproku matul is-​snin taʼ l-​iżvilupp tat-​tifel jistgħu jnaqqsu l-​problemi iktar tard. The Gazette iżżid li għalkemm matul l-​adolexxenza tfeġġ dik ix-​xewqa għal iktar indipendenza, l-​adolexxenti jibqaʼ jkollhom bżonn “il-​gwida, l-​appoġġ, l-​organizzar u l-​imħabba provduti mill-​ġenituri tagħhom.” Dawn l-​osservazzjonijiet huma fi qbil maʼ proverbju Bibliku li jgħid: “Ħarreġ tifel jimxi fit-​triq it-​tajba; ma joħroġx minnha lanqas meta jixjieħ.” (Proverbji 22:6) Alla jwissi lill-​ġenituri sabiex ikunu eżemplari, kumpanni, komunikaturi, u għalliema.—Dewteronomju 6:6, 7.