L-​Interpretazzjoni tal-​Bibbja—Mill-​Influwenza taʼ Min?

DEFINIZZJONI waħda tal-​kelma “interpreta” hi “li wieħed jifforma opinjoni fid-​dawl tat-​twemmin, il-​ġudizzju, jew iċ-​ċirkustanzi taʼ l-​individwu.” (Webster’s Ninth New Collegiate Dictionary) B’hekk, l-​interpretazzjoni taʼ dak li jkun dwar kwalunkwe ħaġa normalment hija influwenzata mill-​isfond, l-​edukazzjoni, u t-​trobbija tiegħu.

Iżda xi ngħidu dwar l-​interpretazzjoni tal-​Bibbja? Ħelsin aħna biex nispjegaw xi siltiet tal-​Bibbja skond it-​“twemmin, il-​ġudizzju, jew iċ-​ċirkustanzi” tagħna? Naturalment, il-​biċċa l-​kbira taʼ l-​istudjużi u t-​tradutturi tal-​Bibbja jistqarru li huma mhux hekk jagħmlu imma li huma gwidati minn Alla.

Eżempju wieħed hu dak li jintqal fin-​nota taʼ taħt taʼ Ġwann 1:1 fin-​New Version of the Four Gospels, pubblikat fl-​1836 minn John Lingard taħt il-​psewdonimu “Kattoliku.” Din tgħid: “Nies taʼ kull twemmin reliġjuż isibu l-​konferma taʼ l-​opinjonijiet partikulari tagħhom fl-​Iskrittura Mqaddsa: għax, fil-​fatt, m’hijiex l-​Iskrittura li tinformahom, imma huma stess li jżidu t-​tifsira persunali tagħhom mal-​lingwaġġ taʼ l-​Iskrittura.”

Għalkemm dan il-​punt huwa ġustifikat, x’kienet l-​intenzjoni tal-​kittieb? Il-​kumment tiegħu kien qed jappoġġa l-​interpretazzjoni tiegħu taʼ dan il-​vers, li ttraduċieh: “Fil-​bidu kienet ‘il-​kelma;’ u ‘l-​kelma’ kienet m’Alla; u ‘l-​kelma’ kienet Alla,” verżjoni tipika tat-​Trinità.

X’kien li ġiegħel lill-​kittieb jittraduċi Ġwann 1:1 bħala appoġġ għad-​duttrina tat-​Trinità? Hija ‘l-​Iskrittura li tinformah’ biex jagħmel hekk? Dan hu impossibbli, għaliex imkien fil-​Bibbja ma jinstab it-​tagħlim tat-​Trinità. Innota x’tgħid The New Encyclopædia Britannica dwar dan: “La l-​kelma Trinità u lanqas id-​duttrina espliċita ma jidhru fit-​Testment il-​Ġdid.” Iżjed minn hekk, il-​professur E. Washburn Hopkins mill-​Università taʼ Yale osserva: “Mid-​dehra, għal Ġesù u għal Pawlu, id-​duttrina tat-​trinità ma kinitx magħrufa; . . . huma ma jgħidu xejn dwarha.”

Allura x’nistgħu nikkonkludu dwar dawk li jappoġġaw interpretazzjoni Trinitarjana taʼ Ġwann 1:1 jew taʼ kwalunkwe vers ieħor fil-​Bibbja? Skond il-​kriterju taʼ Mr. Lingard stess, “m’hijiex l-​Iskrittura li tinformahom, imma huma stess li jżidu t-​tifsira persunali tagħhom mal-​lingwaġġ taʼ l-​Iskrittura.”

X’barka li għandna l-​Kelma t’Alla stess biex tiggwidana fuq dan. “Dan fuq kollox għandkom tkunu tafu,” qal l-​appostlu Pietru, “li l-​ebda profezija taʼ l-​Iskrittura ma għandu ħadd ifissirha minn rasu. Għax qatt ma kien li xi profezija ġiet mir-​rieda tal-​bnedmin; imma, meta l-​bnedmin tkellmu f’isem Alla, dan għamluh għax kienu mqanqlin mill-​Ispirtu s-​Santu.”—2 Pietru 1:20, 21.