Gwida fl-​Għażla taʼ Sħubija Tajba

IŻ-​ŻGĦAŻAGĦ iduru lejn sħabhom minflok ma jduru lejn il-​ġenituri tagħhom biex jiggwidawhom fl-​għażla tagħhom tal-​ħwejjeġ u tal-​mużika, josserva rapport fir-​Reader’s Digest. Għalhekk, huwa vitali li l-​ġenituri jkunu jafu maʼ min qed jagħmluha wliedhom u fejn qed imorru.

“Hija r-​responsabbiltà tiegħek li titkixxef,” tgħid Esmé van Rensburg, il-​lekċerer prinċipali fid-​dipartiment tal-​psikoloġija f’università fl-​Afrika t’Isfel. Hi żżid: “Wisq probabbli, ibnek ma tantx se jieħu gost bik, imma wara ftit jgħaddilu.” Imbagħad tagħti dawn il-​pariri lill-​ġenituri. Ir-​regoli għandhom ikunu loġiċi u bbażati fuq prinċipji definiti; agħti widen għal dak li għandu x’jgħidlek ibnek; tagħmilx plejtu, imma żomm il-​kalma, u aħseb minn qabel dak li trid tgħid. Jekk ibnek diġà żviluppa ħbiberija maʼ xi ħadd li ma tixtiqux jagħmilha miegħu, iffoka fuq l-​imġiba inaċċettabbli li sar għandu mindu għamel ħbieb miegħu minflok ma sempliċement tipprojbixxi li jkompli jagħmilha miegħu.

Pariri siewja għall-​ġenituri ilhom disponibbli għal ħafna żmien fil-​Kelma t’Alla, il-​Bibbja. Per eżempju, din tistqarr: ‘Kun ħafif biex tismaʼ, tqil biex titkellem, tqil biex tinkorla.’ (Ġakbu 1:19) L-​Iskrittura tagħti wkoll dan il-​parir mill-​aħjar dwar l-​għażla taʼ dawk li nagħmluha magħhom: “Min jagħmilha maʼ l-​għaref, isir għaref, min imur mal-​boloh, jaqaʼ fl-​hemm.” (Proverbji 13:20) Dawn l-​eżempji juru l-​għerf li huwa disponibbli għal dawk li jaqraw il-​Bibbja b’apprezzament u japplikaw dak li tgħid fil-​ħajja tagħhom taʼ kuljum.