Inħarsu Isimna

LI TIFLI bir-​reqqa pittura sabiħa tistaʼ tkun esperjenza premjanti. Meta jħares mill-​qrib, wieħed jistaʼ jinnota kif pittur juża mijiet taʼ daqqiet taʼ pinzell biex japplika diversi kuluri fuq it-​tila.

Bl-istess mod, reputazzjoni tajba tiġi żviluppata, mhux b’daqqa waħda taʼ pinzell, biex ngħidu hekk, imma b’ħafna atti żgħar matul perijodu taʼ żmien. Iva, bil-​mod il-​mod nistgħu nifformaw ir-​reputazzjoni tagħna permezz taʼ l-​azzjonijiet li nagħmlu.

Min-naħa l-​oħra, daqqa waħda taʼ pinzell fejn mhux suppost tistaʼ tnaqqas il-​valur tal-​pittura. L-​istess ħaġa fil-​każ taʼ isimna. Is-​Sultan għaref Salamun qal: “Bi bluhatu l-​bniedem jgħarraq ħajtu.” (Proverbji 19:3) Kulma trid huwa ftit minn din l-​hekk imsejħa bluha​—forsi tfaqqigħa vjolenti taʼ rabja, abbuż żejjed minn xorb alkoħoliku, jew att sesswali wieħed mhux xieraq—​biex ittappan reputazzjoni tajba. (Proverbji 6:32; 14:17; 20:1) Kemm huwa vitali, għaldaqstant, li nistinkaw biex niksbu isem tajjeb u naħdmu b’mod żeluż biex nipproteġuh.​—Qabbel Apokalissi 3:5.