Rebħa fuq il-​Ħażen

“GĦALA dan il-​kelb mejjet qiegħed jisħet lil sidi s-​sultan? Ħa mmur u naqtagħlu rasu barra!” Din il-​proposta ħareġ biha Abisaj, kap taʼ l-​eżerċtu Iżraelit. Kienet ir-​risposta kollha għadab tiegħu hekk kif semaʼ lil wieħed Benjamini jismu Simgħi jgħajjar b’mibegħda lil sidu, is-​Sultan David.—2 Samwel 16:5-9.

Abisaj kien qed jaġixxi fuq kif jaħsbuha ħafna nies illum​—il-​prinċipju taʼ kif jagħmluli nagħmlilhom. Iva, Abisaj ried iġiegħel lil Simgħi jsofri talli kien insulta lil David.

Madankollu, x’kienet ir-​reazzjoni taʼ David? David rażżan lil Abisaj billi qal: “Ħalluh.” Għalkemm kien bla ħtija mill-​akkużi taʼ Simgħi, David b’mod umli rreżista t-​tentazzjoni li jirritalja. Minflok, ħalla l-​kwistjoni f’idejn Jehovah.—2 Samwel 16:10-13.

Meta David reġaʼ ħa t-​tron wara li kien ħeles mir-​rewwixta li kien għamillu ibnu u li ma rnexxietx, wieħed minn taʼ l-​ewwel li tah merħba u talbu għal maħfra kien Simgħi. Għal darb’oħra Abisaj ried joqtlu, imma David reġaʼ ma ħalliehx.—2 Samwel 19:15-23.

F’dan il-​mument, David wera li kien stampa xierqa taʼ Ġesù Kristu, li dwaru l-​appostlu Pietru kiteb: “Meta għajjruh ma weġibx bit-​tagħjir . . . imma ħalla f’idejn l-​Imħallef ġust.”—1 Pietru 2:23.

Illum, il-​Kristjani huma mwissijin biex ikunu ‘b’qalb umli, ma jroddux deni b’deni.’ (1 Pietru 3:8, 9) Billi nsegwu l-​korsa mqegħda quddiemna minn David u Ġesù Kristu, aħna wkoll nistgħu nibqgħu ‘nirbħu l-​ħażen bit-​tajjeb.’—Rumani 12:17-21.