Tiftakar Int?
Apprezzajt int il-qari tal-ħarġiet reċenti taʼ It-Torri taʼ l-Għassa? Mela, ara jekk tistax twieġeb il-mistoqsijiet li ġejjin:
◻ L-espressjoni taʼ Pawlu “ambaxxaturi taʼ Kristu” għala hi daqshekk addattata għal Kristjani midlukin? (2 Korintin 5:20)
Fl-antik, l-ambaxxaturi kienu jintbagħtu prinċipalment matul perijodi taʼ ostilità biex jaraw jekk setgħux jiġu skansati l-gwerer. (Luqa 14:31, 32) Ladarba d-dinja taʼ bnedmin midinba hija mbegħda minn Alla, hu qed jibgħat lill-ambaxxaturi midlukin tiegħu biex jinformaw lin-nies dwar it-termini tiegħu għar-rikonċiljazzjoni, billi jħeġġuhom ifittxu l-paċi m’Alla.—12/15, paġna 18.
◻ X’inhuma erbaʼ affarijiet li saħħew il-fidi t’Abraham?
L-ewwel, hu wera l-fidi tiegħu f’Jehovah billi ta kas meta Alla tkellem (Lhud 11:8); it-tieni, il-fidi tiegħu kellha x’taqsam sew mat-tama li kellu (Rumani 4:18); it-tielet, Abraham spiss kien jitkellem maʼ Jehovah; u r-rabaʼ, Jehovah ta appoġġ lil Abraham meta dan segwa l-gwida divina. L-istess affarijiet jistgħu jsaħħu l-fidi tagħna llum.—1/1, paġni 17, 18.
◻ Xi tfisser l-espressjoni “La ddaħħalniex fit-tiġrib”? (Mattew 6:13)
Inkunu qed nitolbu lil Alla biex ma jħalliniex naqgħu meta nkunu ttantati biex ma nobduhx. Jehovah jistaʼ jiggwidana sabiex ma nċedux u ma nintrebħux minn Satana, il-“wieħed mill-agħar.” (1 Korintin 10:13)—1/15, paġna 14.
◻ Wieħed x’irid jagħmel biex jirċievi l-maħfra t’Alla għall-għemil ħażin?
Il-qrara tagħna m’Alla trid tkun akkumpanjata minn sogħba u minn “frott li jixraq lill-indiema.” (Luqa 3:8) Spirtu niedem u xewqa li nsewwu l-ħażin se jqanqluna wkoll biex infittxu l-għajnuna spiritwali t’anzjani Kristjani. (Ġakbu 5:13-15)—1/15, paġna 19.
◻ Għala għandna nħabirku biex inkunu umlin?
Bniedem umli għandu paċenzja u sabar fit-tul, u ma jaħsibx li hu xi ħaġa. L-umiltà tattira ħbieb veri li jħobbuk. Iktar minn hekk, iġġib il-barka taʼ Jehovah. (Proverbji 22:4)—2/1, paġna 7.
◻ X’differenza kruċjali hemm bejn il-mewt taʼ Ġesù u dik taʼ Adam?
Il-mewt taʼ Adam kienet mistħoqqa, għax hu m’obdiex apposta lill-Ħallieq tiegħu. (Ġenesi 2:16, 17) B’kuntrast, il-mewt taʼ Ġesù kienet totalment mhix mistħoqqa, għax “ma kien għamel ebda dnub.” (1 Pietru 2:22) Għalhekk, meta miet Ġesù, kellu xi ħaġa taʼ valur enormi li l-midneb Adam ma kellux f’mewtu—id-dritt għal ħajja umana perfetta. B’hekk, f’li tifdi lill-umanità, il-mewt taʼ Ġesù kellha valur sagrifikali.—2/15 paġni 15, 16.
◻ Fil-viżjoni profetika t’Eżekjel, il-belt taʼ liema ħaġa tat stampa?
Ladarba l-belt tinsab f’nofs art profana (mhux qaddisa), trid tkun xi ħaġa taʼ l-art. Għalhekk, tidher li tagħti stampa taʼ l-amministrazzjoni fuq l-art li tibbenefika lil dawk kollha li se jifformaw is-soċjetà taʼ tjieba fuq l-art.—3/1, paġna 18.
◻ Ġesù għala ħasel saqajn id-dixxipli tiegħu meta kienu qed jiċċelebraw il-Qbiż fit-33 E.K.?
Ġesù ma kienx qed jistitwixxi xi ritwal taʼ ħasil tas-saqajn. Minflok, kien qed jgħin lill-appostli tiegħu jadottaw attitudni ġdida—waħda taʼ umiltà u rieda li jagħmlu l-iktar affarijiet baxxi f’isem ħuthom.—3/1 paġna 30.
◻ Meta nkunu qed ngħallmu lil ħaddieħor, x’inhu iktar importanti mill-abbiltajiet naturali?
Il-kwalitajiet li għandna u d-drawwiet spiritwali li kkultivajna li l-istudenti jistgħu jimitaw. (Luqa 6:40; 2 Pietru 3:11, NW)—3/15, paġni 11, 12.
◻ Il-kelliema pubbliċi kif jistgħu jtejbu l-qari tagħhom taʼ l-Iskrittura?
Billi jipprattikaw. Iva, billi jaqraw b’leħen għoli għal darba wara l-oħra sakemm ikunu jistgħu jaqraw b’mod fluwenti. Jekk fil-lingwa tiegħek hemm il-Bibbja fuq awdjokasetts, ikun għaqli li tismaʼ l-modulazzjoni u l-enfasi fuq il-kliem tal-qarrej u innota l-pronunzja taʼ l-ismijiet u l-kliem tqil.—3/15, paġna 20.
◻ ‘L-ispirtu’ kif ‘imur lura lejn Alla’ mal-mewt taʼ persuna? (Koħèlet 12:7, NW)
Ladarba l-ispirtu huwa l-forza tal-ħajja, dan ‘imur lejn Alla’ fis-sens li kwalunkwe tama taʼ ħajja futura għal dik il-persuna issa tiddependi totalment minn Alla. Alla biss jistaʼ jirrestawra l-ispirtu, jew forza tal-ħajja, billi jġiegħel lil persuna terġaʼ tieħu l-ħajja. (Salm 104:30)—4/1, paġna 17.