L-​Awtoritajiet Ifaħħru lix-​Xhieda

F’Cádiz, fi Spanja, belt b’port li tinsab madwar 500 kilometru fil-​lbiċ taʼ Madrid, is-​sindku Doña Teófila Martínez ippreżentat plakka kommemorattiva (murija hawn fuq) lix-​Xhieda taʼ Jehovah. Din tgħid hekk: “Il-​Kunsill tal-​belt taʼ Cádiz lix-​Xhieda taʼ Jehovah bħala turija taʼ l-​apprezzament għall-​kollaborazzjoni u l-​isforzi tagħhom għan-​nom taʼ din il-​belt.” X’għamlu x-​Xhieda biex jirċievu unur bħal dan?

Din ngħatat bħala rikonoxximent għax-​xogħol li għamlu x-​Xhieda sabiex jirrinnovaw parti mill-​istejdjum muniċipali tal-​belt. Matul diversi Sibtijiet u Ħdud, mijiet taʼ Xhieda għenu volontarjament biex jirristrutturaw it-​tojlits tas-​sular t’isfel taʼ l-​istejdjum tal-​futbol taʼ Carranza. Issa, kulmin juża l-​istejdjum jistaʼ jibbenefika mill-​katusi, mill-​installazzjoni taʼ l-​ilma, u mill-​materjal li ntuża għall-​art.

Ix-Xhieda taʼ Jehovah issa ilhom għal xi żmien igawdu relazzjoni tajba mal-​belt taʼ Cádiz. Kull sena, il-​kunsill tal-​belt bil-​korteżija joffri l-​Istejdjum taʼ Carranza lix-​Xhieda għall-​konvenzjoni distrettwali tagħhom taʼ kull sena. Għaldaqstant, ix-​Xhieda jieħdu pjaċir meta jkunu jistgħu jagħmlu xi ħaġa biex jgħinu jżommu l-​istejdjum f’kundizzjoni tajba.

Flimkien maʼ dan ix-​xogħol manwali taʼ kultant, madankollu, ix-​Xhieda taʼ Jehovah jżuru regolarment l-​akkwati tal-​belt biex jgħinu lill-​pubbliku b’mod ieħor. Huma jipproklamaw l-​“aħbar tajba” tas-​Saltna t’Alla. M’għandniex xi ngħidu, huma ma jiħdux sehem fil-​ministeru pubbliku tagħhom biex jirċievu t-​tifħir mingħand in-​nies. Dan jagħmluh biex jobdu l-​kmand taʼ Ġesù f’li jippridkaw l-​“aħbar tajba tas-​saltna” u biex ‘jagħmlu dixxipli mill-​ġnus kollha.’ (Mattew 24:14, NW; Mattew 28:19) B’dan il-​mod, ix-​Xhieda taʼ Jehovah jisperaw li jaqdu l-​komunità billi jedukaw lin-​nies fi “triq is-​sewwa.”—Proverbji 12:28.