Proklamaturi tas-​Saltna Jirrapportaw

META l-​gwerra infirxet mal-​pajjiżi tal-​Bosnja u Ħerzegovina, eluf esperjenzaw tbatijiet estremi. Matul dak iż-​żmien taʼ prova, ix-​Xhieda taʼ Jehovah għamlu kull sforz sabiex jagħtu inkuraġġiment u tama lin-​nies. Dawn huma xi siltiet minn ittra miktuba minn Xhud li qeda għal ftit taż-​żmien f’Sarajevo.

“Il-​ħajja hija iebsa hawnhekk, imma n-​nies iwieġbu ħafna għall-​verità tal-​Bibbja. Ix-​Xhieda lokali huma eżempju meraviljuż tal-​perseveranza. Ftit li xejn għandhom affarijiet materjali, imma għandhom spirtu eċċellenti. Kważi ż-​żgħażagħ kollha ġewwa l-​kongregazzjoni jaqdu fil-​ministeru full-time. Il-​pubblikaturi ġodda jiġu inkuraġġiti minn dan iż-​żelu, u hija xi ħaġa normali għalihom li jiddedikaw 60 siegħa jew iktar fix-​xahar għall-​ministeru, preċiż mill-​ewwel xahar tagħhom fis-​servizz.

“Minbarra li nippridkaw minn dar għal dar, aħna pprovajna diversi metodi oħrajn sabiex nilħqu lin-​nies. Per eżempju, kellna riżultati tajbin f’li nqassmu pubblikazzjonijiet tal-​Bibbja fil-​ħafna ċimiterji li hemm ġewwa l-​belt.

“Wieħed Xhud beda jmur ukoll fl-​isptarijiet. Fid-​Dipartiment tal-​Kardjoloġija taʼ sptar f’Sarajevo, it-​tabib ewlieni aċċetta l-​Awake! tat-​8 taʼ Diċembru, 1996, li t-​tema fuq il-​qoxra taʼ barra hi ‘Heart Attack​—What Can Be Done?’ Hu staqsa għal iktar kopji sabiex ikun jistaʼ jqassamhom lil tobba oħrajn. Imbagħad, ix-​Xhieda ngħataw permess biex iżuru lill-​pazjenti kollha fid-​dipartiment tiegħu. B’hekk, fi ftit iktar minn siegħa, ’il fuq minn 100 rivista tqassmu minn sodda għal sodda. Ħafna pazjenti qalu li dik kienet l-​ewwel darba li xi ħadd mar iżurhom fl-​isptar biex joffrilhom inkuraġġiment u tama.

“F’okkażjoni oħra marru jżuru d-​Dipartiment tal-​Pedjatrija b’artikli tar-​rivisti addattati għat-​tfal. It-​tabiba ewlenija wkoll aċċettat ftit kopji taʼ Il-​Ktieb Tiegħi taʼ Stejjer mill-​Bibbja biex iżżommhom fil-​kamra fejn isir il-​qari. Issa l-​ommijiet li jżuru lil uliedhom fl-​isptar jaqrawlhom l-​istejjer tal-​Bibbja kuljum. Saru wkoll arranġamenti biex imorru għand din it-​tabiba fid-​dar tagħha.

“F’Sarajevo hemm eluf taʼ suldati tan-​NATO [Organizzazzjoni tat-​Trattat Nord Atlantiku] taʼ nazzjonalitajiet differenti. Dawn ukoll irċivew xiehda bir-​reqqa. Xi drabi, immorru minn vettura tal-​gwerra għall-​oħra billi nużaw il-​ktejjeb Good News for All Nations flimkien mar-​rivisti Torri taʼ l-​Għassa u Stenbaħ! b’lingwi differenti. Iktar minn 200 rivista tqassmu fil-​kwartieri tat-​truppi Taljani. Ħaġa taʼ l-​iskantament, ħafna suldati Taljani qalu li qatt qabel ma kienu tkellmu max-​Xhieda taʼ Jehovah. Madankollu, irnexxielna nikkuntattjawhom f’Sarajevo.

“Darba waħda kien hemm vettura tal-​gwerra wieqfa fil-​ġenb tat-​triq. Jien ħabbatt fuq il-​vettura bl-​umbrella tiegħi, u minnha ħareġ suldat. Offrejtlu t-​Torri taʼ l-​Għassa bit-​titlu fuq il-​qoxra taʼ barra ‘Messaġġiera tal-​Paċi​—Min Huma?’ Is-​suldat ħares lejja u staqsieni, ‘Int m’intix xi wieħed mix-​Xhieda taʼ Jehovah, hux?’ Wara li sar jaf li jien wieħed minnhom, weġibni, ‘Ma nistax nemmen; issibkom hawnhekk ukoll! Hemm xi post fid-​dinja fejn m’hemmx Xhieda?’”

L-appostlu Pawlu ħeġġeġ: “Xandar il-​kelma, insisti f’waqtu u barra minn waqtu.” (2 Timotju 4:2) Bħal sħabhom kredenti mad-​dinja kollha, ix-​Xhieda taʼ Jehovah f’Sarajevo hekk qed jagħmlu, saħansitra minn sodda għal sodda u minn vettura tal-​gwerra għall-​oħra!