Gżira Mwarrba u Żgħira
L-AĠĠETTIVI li jintużaw l-iktar biex jiddeskrivu l-gżira taʼ Santa Elena huma “mwarrba” u “żgħira.” Tassew jixirqulha, għax din il-gżira, twila sbatax-il kilometru u wiesgħa għaxar kilometri, tinsab 1,950 kilometru ’l bogħod mill-eqreb art, il-kosta fil-Lbiċ taʼ l-Afrika. Kien hawnhekk li Napuljun Bonaparti ġie tturufnat fl-1815 biex iqattaʼ l-aħħar snin taʼ ħajtu bħala eżiljat megħlub.
Mill-oċean il-gżira tidher qisha fortizza impressjonanti. Attwalment hija vulkan mejjet li tielgħa dritt dritt mill-Atlantiku b’irdumijiet tal-biżaʼ għoljin bejn 500 u 700 metru. Fiċ-ċentru tagħha, il-Muntanja Actaeon, f’għoli taʼ 818-il metru, tiddomina l-gżira kollha kemm hi. Minħabba r-riħ frisk li dejjem jonfoħ bla heda min-naħa t’isfel taʼ l-Atlantiku lejn l-ekwatur u minħabba l-kurrent taʼ l-oċean, il-klima fuq il-gżira hija l-biċċa l-kbira moderata u pjaċevoli. Imma mill-kosta maʼ wiċċ il-baħar sa l-interjuri muntanjuż tal-gżira, teżisti varjetà kbira fil-kundizzjonijiet tat-temp u l-ħdura.
Santa Elena ilha taħt l-Ingliżi minn tmiem is-seklu 17. Il-popolazzjoni żgħira taʼ xi 5,000 ruħ hija taħlita taʼ nies b’oriġini Ewropej, Asjatiċi u Afrikani. L-Ingliż huwa l-lingwa wżata fuq il-gżira, imma jitkellmuh b’aċċent distint. Ma nsibu l-ebda ajruport hawnhekk; l-uniku kuntatt mal-bqija tad-dinja huwa bil-baħar, permezz taʼ traġitti regulari lejn l-Afrika t’Isfel u l-Ingilterra. Fil-fatt, ix-xandir bit-televiżjoni sar disponibbli biss f’nofs is-snin disgħin, bis-saħħa taʼ kuntatt bis-satellita.
L-aħbar tajba tas-Saltna t’Alla laħqet dawn l-ixtut għall-ewwel darba fil-bidu tas-snin tletin. (Mattew 24:14) Matul is-snin, ħafna residenti tal-gżira kisbu dan it-teżor li jagħmel lir-rikkezzi materjali bla siwi taʼ xejn. (Mattew 6:19, 20) Illum, Santa Elena hija unika fis-sens li għandha medja taʼ Xhud wieħed għal kull 31 ruħ mill-popolazzjoni, l-aqwa waħda fid-dinja!
[Mapep f’paġna 24]
(Għall-formazzjoni sħiħa tat-test, ara pubblikazzjoni)
Santa Elena
JAMESTOWN
Levelwood
L-AFRIKA
L-OĊEAN ATLANTIKU
Santa Elena