Se Tagħti Kas tat-Twissija?
FID-19 taʼ Mejju, 1997, ċiklun kines id-distrett taʼ Chittagong, il-Bangladexx. Fil-belt taʼ Cox Bazaar għamlu rjiħat li laħqu l-250 kilometru fis-siegħa. Fl-irħula, l-għerejjex b’soqfa tat-tiben sparixxew għalkollox, waqt li warajhom ħallew forom fit-tajn taʼ fejn kienu darba. Siġar u arbli tat-telegrafu tqaċċtu; oħrajn inqasmu min-nofs bħal zkuk tas-sulfarini. Titlu fil-gazzetta Bhorar Kagoj irrapporta li 105 persuni nqatlu miċ-ċiklun.
Ir-rapport tat-temp ħabbar id-direzzjoni ġenerali tal-maltempata madwar 36 siegħa bil-quddiem. Mingħajr ebda dubju, ħafna ħajjiet ġew salvati hekk kif mijiet t’eluf taʼ nies marru jistkennu f’xeltrijiet tal-konkos mibnijin apposta kontra ċ-ċiklun.
Ix-Xhieda taʼ Jehovah ilhom iktar minn mitt sena issa jxandru aħbarijiet dwar diżastru ferm fil-qrib li se jkun bil-wisq iktar distruttiv minn kwalunkwe ċiklun. Il-Bibbja ssejjaħlu “Jum il-Mulej, kbir u tal-biżaʼ!” (Ġoel 3:4 [Ġoel 2:31, NW]) Billi nagħtu kas tal-messaġġi profetiċi taʼ twissija misjubin fil-Bibbja, aħna nistgħu naħarbu minn din il-korla.—Sofonija 2:2, 3.
Le, ix-Xhieda taʼ Jehovah m’humiex profeti taʼ kundanna. Il-messaġġ tagħhom hu wieħed taʼ tama. Huma jixtiequ jgħinu lin-nies jitgħallmu dwar is-Saltna t’Alla, li dalwaqt se teħles lill-art mill-ħażen kollu. Il-Kelma t’Alla, il-Bibbja, tgħidilna: “Ftit ieħor, u l-ħażin ma jkunx aktar; għad tħares fejn kien u ma ssibux. Imma l-ġwejdin għad jirtu l-art, u bi sliem kotran jitgħaxxqu.”—Salm 37:10, 11.
[Sors taʼ l-Istampa f’paġna 32]
WHO/League of Red Cross