Attenti mis-​Simonija!

XMUN tas-​Samarija kien ferm meqjus fil-​komunità tiegħu. Kien jgħix fl-​ewwel seklu E.K., u n-​nies kienu tant imsaħħrin bil-​prattika tiegħu taʼ l-​arti maġika, li kienu jgħidu dwaru: “Dan il-​bniedem hu l-​Qawwa taʼ Alla, li jgħidulha l-​Qawwa l-​Kbira!”—Atti 8:9-11.

Madankollu, wara li Xmun sar Kristjan mgħammed, irrikonoxxa qawwa akbar minn dik li kien juri hu qabel. Kienet il-​qawwa li niżlet fuq l-​appostli taʼ Ġesù, li għamlithom kapaċi jagħtu lil oħrajn għotjiet mirakolużi taʼ l-​ispirtu qaddis. Xmun kien tant impressjonat li offra l-​flus lill-​appostli u talabhom: “Agħtu din is-​setgħa lili wkoll, biex kull min inqiegħed idejja fuqu jirċievi l-​Ispirtu s-​Santu.”—Atti 8:13-19.

L-appostlu Pietru ċanfar lil Xmun, billi qallu: “Alla jeqred flusek u lilek magħhom, ladarba ħsibt li bi flusek tistaʼ tixtri don tiegħu! Int ma għandekx x’taqs[am] f’din il-​ħaġa, ma għandek ebda jedd għaliha; qalbek m’hijiex sinċiera quddiem Alla!”—Atti 8:20, 21.

Minn dan ir-​rakkont Bibliku tiġi l-​kelma “simonija,” li kienet ġiet definita bħala “d-​dnub tax-​xiri jew bejgħ tal-​pożizzjonijiet jew promozzjonijiet fil-​knisja.” In-​New Catholic Encyclopedia tammetti li speċjalment mid-​disaʼ sal-​ħdax-il seklu “s-​simonija nxterdet fil-​monasterji, fost il-​kleru, fost l-​isqfijiet, u saħansitra fil-​papat.” Id-​disaʼ edizzjoni taʼ The Encyclopædia Britannica (1878) tinnota: “Studju dwar l-​istorja tal-​konklavi Papali jikkonvinċi lill-​istudenti li qatt ma kien hemm elezzjoni fil-​knisja li ma ntmessitx mis-​simonija, waqt li f’numru kbir taʼ drabi li ġiet ipprattikata s-​simonija fil-​konklav, din kienet mill-​iktar sfiqa, l-​iktar sfaċċata u l-​iktar fid-​dieher.”

Il-Kristjani veri llum iridu joqogħdu ħafna attenti mis-​simonija. Per eżempju, xi wħud għandhom mnejn jagħtu tifħir iżżejjed jew rigali ġenerużi lil dawk li jistgħu jagħtuhom iżjed privileġġi. Min-​naħa l-​oħra, dawk li jistgħu jagħtu privileġġi bħal dawn għandhom mnejn juru favoritiżmu lejn dawk li jistgħu​—u spiss ikunu ħerqanin li—​jagħtuhom ħafna rigali. Iż-​żewġ sitwazzjonijiet jinvolvu s-​simonija, u l-​Iskrittura tikkundannaha b’mod ċar korsa bħal din. “Indem minn dan il-​ħażen tiegħek,” ħeġġeġ Pietru lil Xmun, “u itlob lill-​Mulej biex forsi jaħfirlek dan il-​ħsieb tiegħek [“[i]l-ħsieb taʼ qalbek,” KŻ]; għax, milli qiegħed nara, int qalbek mimlija mrar u l-​ħażen jassrek.”—Atti 8:22, 23.

B’ferħ, Xmun ra s-​serjetà tax-​xewqa żbaljata tiegħu. Hu talab lill-​appostli: “Itolbu intom għalija lill-​Mulej, ħalli ma jiġrili [x]ejn minn dan li intom għedtu.” (Atti 8:24) Billi jagħtu kas tal-​lezzjoni importanti li fih dan ir-​rakkont, il-​Kristjani ġenwini jħabirku biex jevitaw kwalunkwe tinġis tas-​simonija.