Il-​Membri tal-​Kleru Kollha Jemmnu Dak li Jgħallmu?

IR-​RAĠEL taʼ din il-​mara għadu kif miet. Il-​qassis tagħha jispjega li żewġha la kien raġel tajjeb biżżejjed biex jitlaʼ s-​sema mill-​ewwel u lanqas ma kien raġel daqshekk ħażin li jistħoqqlu jintefaʼ fin-​nirien taʼ l-​infern. Għalhekk, skond il-​qassis, hu qiegħed ibati l-​kastig sakemm jikkwalifika għas-​sema. Il-​mara tħallas lill-​qassis biex jitlob għal żewġ­ha ħalli ma jdumx wisq ma joħroġ mill-​purgatorju. L-​armla tinsab kuntenta b’dan u tħoss li l-​qassis ukoll jemmen bħalha.

Taħseb li l-​armla tkun iddiżappuntata li kieku kellha ssir taf li l-​qassis tagħha lanqas biss jemmen bil-​kastig wara l-​mewt? Ħafna nies iħossuhom mifxulin meta jsiru jafu li għadd kbir mill-​membri tal-​kleru kważi ma jemmnu fl-​ebda ħaġa minn dak li jgħall­mu huma stess. Il-​gazzetta National Catholic Reporter, waqt li tikkummenta dwar dik li sejħitilha “problema klerikali iktar gravi minn tas-​sess,” stqarret: “Fost il-​biċċa l-​kbira tal-​kleru, tant hemm uħud li m’għadhomx jemmnu fl-​eżistenza t’Alla jew fit-​tagħlim li hemm premjijiet u kastigi jew fl-​irxoxt . . . li dan in-​nuqqas taʼ twemmin sar parti mill-​ambjent tal-​kleru, donnu bħaċ-​ċpar.”

Knejjes oħrajn jinsabu fl-​istess ilma. Stħarriġ li sar fuq vigarji taċ-​Church of England irrivela li ħafna minnhom “ma jemmnux f’duttrini fundamentali tal-​fidi Kristjana tradizzjonali bħalma huma t-​twelid minn verġni, il-​mirakli taʼ Ġesù u t-​tieni miġja tal-​messija,” tirrapporta l-​gazzetta Awstraljana, Canberra Times.

George R. Plagenz, kittieb tar-​reliġjon, staqsa kif jistaʼ qassis, b’kuxjenza nadifa, jgħid kredu li lanqas biss jemmen fih. Wieħed qassis qal li hu sempliċement ibiddel il-​kliem li jiftaħ bih il-​kredu, “JIEN nemmen.” Hu qal: “Jien nibda l-​kredu billi ngħid, ‘HUMA jemm­nu f’Alla l-​Missier li Jistaʼ Kollox . . .’” Plagenz sejjaħ ipokresija bħal din “l-​akbar logħba taʼ ingann fil-​pajjiż.”

B’sogħba, ħafna nies jiddiżappuntaw ruħhom rigward ir-​reliġjon in ġenerali meta jaraw dan in-​nuqqas taʼ twemmin u taʼ sinċerità min-​naħa tal-​kleru. Imma dan m’huwiex l-​uniku aspett inkwetanti tar-​reliġjon illum il-​ġurnata. Il-​biċċa l-​kbira taʼ dawk li jmorru l-​knisja ġew mgħallmin li l-​Bibbja hija l-​Kelma t’Alla. Tgħid jissorprendu ruħhom meta jsiru jafu li xi duttrini li ilhom aċċettati mill-​knisja m’humiex mgħallmin fil-​Bibbja? L-​artiklu li jmiss se jikkunsidra eżempju wieħed.